საყოველთაო ჯანდაცვის სისტემის ფარგლებში კლინიკებში საერთო სატარიფო სისტემასთან დაკავშირებით სამინისტროსთან ერთად სამუშაო ჯგუფი შეიქმნება. ამის შესახებ სამედიცინო სფეროს წარმომადგენლებმა პრემიერ-მინისტრთან და ჯანდაცვის მინისტრთან შეხვედრის შემდეგ განაცხადეს. 4 დეკემბრის შეხვედრას 30-მდე კლინიკის ხელმძღვანელი ესწრებოდა

კარდიოქირურგთა ასოციაციის პრეზიდენტი, სულხან ლომინაძე ამბობს, რომ პრემიერი სატარიფო სისტემასთან დაკავშირებით 520-ე დადგენილების გაუქმებას არ დათანხმდა, თუმცა რამდენიმე საკითხი გადაიხედება.

"რაღაც მიმართულებებში არის უბრალოდ წარმოუდგენელი იმ ფასებში ოპერაციისა და პროცედურების გაკეთება. ეს გადაიხედება პირველ რიგში. სამომავლოდ უნდა შევთანხმდეთ, რომ ნებისმიერი ცვლილება არ იყოს მტკივნეულ დარგისთვის და ჩვენი მოქალაქეებისთვის", — განაცხადა რუსთავი 2-თან სულხან ლომინაძე.

21 ნოემბრიდან საყოველთაო ჯანდაცვის სისტემის ფარგლებში კარდიოლოგიური მიმართულებით ყველა კლინიკაში საერთო სატარიფო სისტემა ამოქმედდა.

კლინიკების წარმომადგენელთა მხრიდან, რეფორმის გადავადების მოთხოვნის მიუხედავად, ცვლილება ძალაში შევიდა. ჯანდაცვის სამინისტროს მონაცემების მიხედვით, გულის არტერიების ანგიოგრაფიის ძველი ტარიფი 737,5 ლარი იყო, რომელიც ცვლილების შედეგად 550 ლარამდე შემცირდა, განახლებული ტარიფიკაცია კიდევ 20 სახის კარდიოლოგიურ მომსახურეობას ეხება.

საკანონმდებლო ინიციატივასთან დაკავშირებით, 21 ნოემბერს, პარლამენტში შეხვედრა გაიმართა, რომელსაც კერძო სექტორისა და ჯანდაცვის სამინისტროს წარმომადგენლები, ჯანდაცვის კომიტეტის ხელმძღვანელი და ბიზნესომბუდსმენი ესწრებოდნენ.

კარდიოლოგთა ასოციაციის პრეზიდენტმა, ალექსანდრე ალადაშვილმა საზოგადოებრივ მაუწყებელთან საუბრისას აღნიშნა, რომ მსგავსი სახის მომსახურება ძვირადღირებულია. მისი განმარტებით, დაბალი ფასის პირობებში მაღალი ხარისხის მასალას ვერ გამოიყენებენ.