LivePress-ის ინფორმაციით, ზუგდიდში, ივერიის ღვთისმშობლის სახელობის მშენებარე საკათედრო ტაძრის მიმდებარე ტერიტორიაზე მარადმწვანე ხეები სასულიერო პირის ინიციატივით მოჭრეს.

გამოცემის ცნობით, ტერიტორია, სადაც ხეები მოიჭრა, ეპარქიას არ ეკუთვნის. ის შპს აგრომეტის საკუთრებაა.

LivePress-ის კითხვაზე თუ ვისი ნებართვით მოიჭრა ხეები მღვდელმა გერასიმე აბულაძემ განაცხადა, რომ 30-მდე ხე მისი ინიციატივით მოიჭრა და ნებართვა არავისთვის უთხოვია:

"არც მივსულვარ ნებართვაზე, არ ვიცოდი საჭირო რომ იყო. ხის მოჭრის მიზეზი არის ის, რომ ახალი ხეები ირგვება. მოიჭრა 20-30 ხე, კი არ ვყიდით ამ ხეებს, კი არ ვანადგურებთ, მასალა კი არ მჭირდება, ან შეშა, ხელს გვიშლიდა, პერიმეტრი უნდა გაგვეთავისუფლებინა, ყოველ მეტრნახევარში კიპარისი დაირგვება. 580 კიპარისის ხე, თან უბრალო კი არა დეკორატიული, იტალიიდან ჩამოტანილი, ძვირადღირებული".