მოძრაობა ლელო ქართული ოცნების აქტივისტების მიერ გამართულ ანტიოპოზიციურ აქციებს აგონიაში მყოფი ხელისუფლების მიერ მართულ "სამარცხვინო და სახიფათო მოვლენას" უწოდებს.

"შუღლისა და სამოქალაქო დაპირისპირების გაღვივება დაუშვებელია! ეს პირები არიან ხელისუფლების მიერ მართული ძალები. ქართული ოცნების ხელისუფლება ქვეყანას მართავს დაქსაქსვით და ურთიერთდაპირისპირებით, ეს არღვევს ჩვენი ქვეყნის დემოკრატიულად განვითარების პრინციპებს", — ნათქვამია ლელოს განცხადებაში.

ისინი მოუწოდებენ ხელისუფლებას აღკვეთოს მსგავსი უკანონო მოქმედებები და მკაცრად დასაჯოს ყველა კანონდამრღვევი.

ორი დღეა ქუთაისში ნაციონალური მოძრაობის წინააღმდეგ საპროტესტო აქციებს მართავენ. "დემიშიზაცია ქუთაისიდან იწყება" — ამ წარწერის მქონე ბანერით დღეს, პირველ დეკემბერს ქართული ოცნების მხარდამჭერებმა ქალაქში მსვლელობა მოაწყვეს. აქტივისტებმა ოპოზიციური პარტიის ოფისს კვერცხები და საღებავი ესროლეს.

არა ნაცებს! — ამ შინაარსით აქცია გაიმართა თბილისში, ვერის ბაღში. შეკრების მიზეზად მათ ოპოზიციის პროტესტის ფორმები დაასახელეს.

ნაციონალური მოძრაობის თავმჯდომარე, გრიგოლ ვაშაძე აცხადებს, რომ ქუთაისში მათ ოფისთან ქართულმა ოცნებამ სახელმწიფო მოხელეები მიიყვანა და აქციას ატარებინებს:

"ყველანაირად ცდილობენ, რომ გვიბიძგონ არაცივილიზებული მოქმედებისკენ. ვერ მოგართვით. არავითარი სამოქალაქო დაპირისპირება არ იქნება".

გარდა ამისა, ევროპული საქართველოს დეპუტატის, გიგა ბოკერიას შეფასებით, გვიან ღამით ნაციონალური მოძრაობის ოფისისთვის კვრცხებისა და ცოცხების სროლა აგონიაზე მეტყველებს.