მანდატურებმა #გაბედეს აქტივისტებს თბილისის საქალაქო სასამართლოს ეზოში ლობიოს დათესვის საშუალება არ მისცეს. აქტივისტები ამბობდნენ, რომ სამართალდამცველები უკანონოდ იქცევიან, რადგან ლობიოს დათესვის უფლებას არ აძლევენ.

საბოლოოდ ისინი იძულებული გახდნენ, რომ ლობიო სასამართლოს ტერიტორიის გარეთ დაეთესათ.

ამასთანავე დღეს, პირველ დეკემბერს საპროტესტო აქცია "შეაყარე ოცნებას ლობიო" გაიმართა ქართული ოცნების ცენტრალურ ოფისთან. აქციის მონაწილეებმა ჰაერში სიმბოლურად 41 მარცვალი ლობიო აყარეს.

აღნიშნული აქცია უკავშირდება ლეიბორისტული პარტიის წევრის, ლაშა ჩხარტიშვილის დაკავებასა და მისთვის რვადღიანი პატიმრობის შეფარდებას. როგორც იურისტი ნიკა მემარნიშვილი ამბობს, აქციის ინსპირაცია არის ცნობილი გამონათქვამიდან "კედელს ცერცვი შეაყარე". მისივე თქმით, ჩხარტიშვილი უკანონოდ არის დაკავებული.

"სამწუხაროდ ქართულმა ოცნებამ ვერ ისწავლა მისი წინამორბედების შეცდომებზე და აგრძელებს იგივე ხელწერით მოქმედებას. ადამიანი, რომელიც მთელი ცხოვრება იბრძოდა უსამართლობის წინააღმდეგ, იჭერენ იმის გამო, რომ მან რამდენიმე მარცვალი აყარა ჰაერში", — აღნიშნავს მემარნიშვილი.

მისივე თქმით, მათ სიმბოლურად 41 მარცვალი ლობიო მიიტანეს იმის დასტურად, რომ ჰაერში ლობიოს აყრა სამართალდარღვევა არაა.

ლაშა ჩხარტიშვილი 29 ნოემბერს ეროვნული ბიბლიოთეკის წინ მიმდებარე აქციაზე დააკავეს. რვადღიანი პატიმრობა მას მოსამართლე ვალერიან ფილიშვილმა შეუფარდა.

თვითონ ჩხარტიშვილი გადაწყვეტილების გამოცხადებას არ დასწრებია, რადგან მოსამართლე ვალერიან ფილიშვილმა სასამართლოს შეურაცხყოფისთვის 300 ლარით დააჯარიმა და სხდომის დარბაზიდან გააძევა.

ჩხარტიშვილი ერთ-ერთია იმ ექვსს ადამიანს შორის, რომელიც გამართულ აქციაზე დააკავეს. მას ბრალი ადმინისტრაციული სამართალდარღვევათა კოდექსის 166-ე და 173-ე მუხლებით აქვს წარდგენილი, რაც წვრილმან ხულიგნობასა და პოლიციელის მოთხოვნის დაუმორჩილებლობას გულისხმობს.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.