ევროპული საქართველოს დეპუტატი აკაკი ბობოხიძე ამბობს, რომ უმრავლესობასთან 30 ნოემბრის შეხვედრის ფორმატი არც თუ ისე კარგია. როგორც მან გადაცემა პირველებში ისაუბრა, ოპოზიციის მხრიდან შეხვედრას მხოლოდ ორი პარტია, ნაციონალური მოძრაობა და ევროპული საქართველო და პარლამენტის ყოფილი თავმჯდომარეები, ნინო ბურჯანაძე და დავით უსუფაშვილი დაესწრებიან.

"ჯერ ერთი პროტესტს ხელმძღვანელობს სამოქალაქო საზოგადოება, კონკრეტულად სირცხვილია, გაბედე და შეცვალე. მე ვიცი, რომ ისინი ხვალინდელ ფორმატში არ მონაწილეობენ. ქართული ოცნების მხრიდან გადმოგდებულია როგორი მოქმედება იცით, რომ პირდაპირ უარი უნდა უთხრა. ამაზე უარს მხოლოდ იმიტომ არ ვიტყვით, რომ მასპინძელი უნდა იყოს იყოს [ევროკავშირი]", — განაცხადა ბობოხიძემ.

რაც შეეხება ფორმატის შერჩევას, ბობოხიძე ამბობს, რომ როდესაც ხელისუფლებასთან ევროკავშირის ელჩი მუშაობს, ბუნებრივია, რომ ელჩმა ფორმატი ჯერ იმასთან შეათანხმა, ვინც უფრო მთავარია:

"ის ელოდება ჩვენგან, რომ ხვალ მივიღებთ მონაწილეობას. მე პირადად ვემხრობი, რომ ყველაფრის მიუხედავად, ჩვენი პარტნიორების პატივისცემის ნიშნად შეხვედრა მაინც უნდა შედგეს".

ოპოზიციასა და ხელისუფლებას შორის შეხვედრა ხვალ, 30 ნოემბერს დღის პირველ ნახევარშია დაგეგმილი. შეხვედრას პოლიტიკოსებთან ერთად დიპლომატიური კორპუსის წარმომადგენლების დაესწრებიან. ირაკლი კობახიძის თქმით, მათ ანგარიში გაუწიეს საერთაშორისო პარტნიორებს და დიალოგის რეჟიმზე გადადიან.

პროპორციული სისტემის კანონპროექტის ჩაგდების შემდეგ სამოქალაქო სექტორმა და ოპოზიციურმა პარტიებმა ერთობლივად შესთავაზეს ხელისუფლებას ე.წ. გერმანულ მოდელზე გადასვლა. ვინაიდან კანონპროექტის ჩაგდების მიზეზად მაჟორიტარი დეპუტატების უკმაყოფილება დასახელდა, პროტესტის მონაწილეებმა განაცხადეს, რომ ეს მოდელი მათ პარლამენტში მოხვედრასაც ითვალისწინებდა.

კერძოდ, მოდელის მიხედვით, პარლამენტში ადგილები არჩევნებზე მიღებული ხმების შესაბამისად განაწილდება. მისი საშუალებით, გამარჯვებული მაჟორიტარები იღებენ მანდატებს და შემდგომ მათ პარტიული სიიდან ემატებათ იმდენი დეპუტატი, რამდენიც მათ პროპორციის შესაბამისად ეკუთვნით.

• რას ნიშნავს გერმანული მოდელი საქართველოსთვის

მმართველი გუნდი შეთავაზებას არ დათანხმდა. ქართული ოცნების გენერალური მდივანი კახა კალაძე აცხადებდა, რომ თემა დახურულია და ისინი სხვა ფორმატზე აღარ იმსჯელებენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.