საპატრულო პოლიციის უფროსმა განმარტა, რომ რამდენიმე აქტივისტი პოლიციამ ტერიტორიას განარიდა და არავინ დაუკავებიათ. მისივე თქმით, ისინი "ძალადობრივად ცდილობდნენ კორდონის გარღვევას და პარლამენტთან შეღწევას".

ევროპული საქართველოს წევრი, ელენე ხოშტარია აცხადებს, რომ აქტივისტები სამმართველოში გადაიყვანეს და პოლიციის უფროსის განცხადება სიცრუეა. მისივე ცნობით, დაკავებულებს შორის არიან, ლუკა ბურდული, გიორგი მუმლაძე და გიორგი ჯმუხაძე და ახლა უკვე ადვოკატები მიდიან მათთან.

დღეს დილით პოლიციამ პარლამენტის წინ აქტივისტები დააკავა. სამართალდამცავებთან დაპირისპირებისას მოქალაქეები მანქანაში ძალით ჩასვეს. როგორც ადგილიდან On.ge-ს ჟურნალისტი იუწყება, სულ მცირე სამი ადამიანი წაიყვანეს.

დაპირისპირება მას შემდეგ დაიწყო, რაც ტერიტორიაზე ევროპული საქართველოს დეპუტატი, ელენე ხოშტარია და სირცხვილიას აქტივისტები.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.