პარლამენტის პირველი ვიცე-სპიკერის თანამდებობაზე თამარ ჩუგოშვილს გია ვოლსკი შეცვლის. ეს გადაწყვეტილება დღევანდელ ბიუროს სხდომაზე მიიღეს.

აქამდე ვოსლკი პარლამენტის თავმჯდომარის მოადგილე იყო. მართველი გუნდი ფიქრობს, რომ ვოლსკი ღირსეულად ჩაანაცვლებს ჩუგოშვილს და შეასრულებს, ყველა დაკისრებულ მოვალეობას.

ამ თანამდებობას თამარ ჩუგოშვილი 14 ნოემბერს განვითარებულ მოვლენებამდე იკავებდა. ჩუგოშვილმა უმრავლესობა მას შემდეგ დატოვა, რაც პროპორციული საარჩევნო სისტემის კანონპროექტის ჩავარდა. იმავე მიზეზით, უმრავლესობა კიდევ 11-მა დეპუტატმა დატოვა.

ბოლო დღეების მოვლენები — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.

შეგახსენებთ, რომ პროპორციულ სისტემაზე გადასვლის პირობა ბიძინა ივანიშვილმა დადო, როდესაც 20-21 ივნისს განვითარებული მოვლენების გამო პროტესტი დაიწყო. პროპორციული სისტემა აქცია #სირცხვილიას მთავარი მოთხოვნა იყო.