გოგი წულაიამ ქართული ოცნების დეპუტატებს ფოსტით ვაზელინი და ერთჯერადი ხელსახოცები გაუგზავნა. მან აქცია-პერფორმანსი ქუთაისში, ფოსტის შენობის წინ მოაწყო.

მისი თქმით, ის იუმორით ეხმიანება ქვეყანაში მიმდინარე პროცესებს და ქართულ ოცნებას უგზავნის ვაზელინსა და ხელსახოცებს. წულაია ამბობს, რომ ქაღალდი რბილი ბალიშებით, განკუთვნილია პარტიის თავმჯდომარე ბიძინა ივანიშვილისთვის. იმ დეპუტატებისთვის კი, რომლებიც დღეს აირჩნენ საპარლამენტო კომიტეტების თავმჯდომარეებად, ვაზელინს აგზავნის, რათა მათთვის "არჩევის პროცესი, რაც შეიძლება უმტკივნეულო იყოს".

"მმართველ გუნდს იმდენი შეცდომა აქვს დაშვებული და იმდენჯერ მოქცეულა სამარცხვინოდ, რომ ამ პროცესიდან უმტკივნეულოდ გამოსასვლელად ხელსახოცი და ვაზელინი დასჭირდებათ", — განაცხადა წულაიამ.

მას შემდეგ, რაც ქართული ოცნების დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

ქართულმა ოცნებამ პროპორციულ საარჩევნო სისტემაზე გადასვლის ჩამგდები სამი დეპუტატი დააწინაურა. ნინო წილოსანი გარემოს დაცვის კომიტეტის თავმჯდომარის დაინიშნა. დავით სონღულაშვილი ევროინტეგრაციის კომიტეტის თავმჯდომარე იქნება, ხოლო გურამ მაჭარაშვილი საპროცედურო საკითხთა კომიტეტში დაინიშნა თავმჯდომარედ.