მოძრაობა შეცვალეს წევრებმა პარლამენტთან ხელოვნური აუზი მიიტანეს და პარლამენტის თავმჯდომარეს, არჩილ თალაკვაძეს კომოს ტბა მოუწყვეს. ასე გააპროტესტეს მათ ინფორმაცია, რომ თალაკვაძე საქართველოში განვითარებული მოვლენების ფონზე იტალიაში იმყოფებოდა.

"არჩილ, ჩამოდი და იჭყუმპალავე ამ წყალში და არ დაისვენო 5-ვარკვლავიან სასტუმროში იმ დროს, როცა ქართველი ხალხი შიმშილით იხოცება", — თქვა აქციის ერთ-ერთმა მონაწილემ მთავარ არხთან.

ტელეკომპანიებმა მთავარმა და ფორმულამ გაავრცელეს ინფორმაცია, რომ არჩილ თალაკვაძე კომოს ტბაზე იმყოფებოდა. ამ ინფორმაციას თავად თალაკვაძე ვიდეომიმართვით გამოეხმაურა და "უკიდურესად მიკერძოებული და პოლიტიზირებული" უწოდა.

ამ ვიდეომასალის გავრცელებას ევროპული საქართველოს დეპუტატი, გიორგი კანდელაკიც გამოეხმაურა. მისი თქმით, მან და მისმა თანაგუნდელმა, გიგი წერეთელმა გასულ ღამეს თვითმფრინავით თალაკვაძესთან ერთად იმგზავრეს.

გარდა ამისა, ფეისბუქში ზურაბ მელიქიშვილმა გაავრცელა ფოტომასალა, სადაც თბილისის მერი, კახა კალაძე ცოლთან ერთად და არჩილ თალაკვაძე არიან გადაღებული. ფოტოს გადაღების თარიღი უცნობია და არც მისი ავთენტურობა დადასტურებულა.