ალბათ, არაერთხელ გსმენიათ ნაცნობებისა და უცნობებისგან, რომ თბილისის ზოოპარკში ჟირაფი უნახავთ. ამის დამტკიცებას ცდილობდა ყველა, თუმცა არავის გამოუვიდა. ეს სიტუაცია მალე შეიცვლება, რადგან, ბოლოს და ბოლოს, უამრავი ადამიანის სურვილი და ზოგიერთის ოცნებაც კი ახდება და თბილისის ზოოპარკში ჟირაფები დაიდებენ ბინას.

ადმინისტრაციამ გაგვიმხილა, რომ ახალ ზოოპარკში აფრიკის სავანე ექნება, რომელიც დაახლოებით 10 ჰექტარს დაიკავებს, რაც ძველი ზოოპარკის ტერიტორიაზე ორჯერ დიდია. სწორედ ამ უზარმაზარ ვოილერში დასახლდებიან ჟირაფები. მათ კომპანიონობას სხვადასხვა სახეობის ანტილოპა, ჰიპოპოტამი, მარტორქა და ზებრები გაუწევენ.

აფრიკული სავანის მოწყობაში ზოოპარკების ცნობილი ჰოლანდიელი დიზაინერი ერიკ ფონ ფლიტია ჩართული, რომლის მიზანია ხალხმა ცხოველებისადმი პატივისცემა გამოიჩინონ.

"რით იქნება ახალი ზოოპარკი ძველისგან განსხვავებული? ჩვენმა სტუმარმა [ერიკ ფონ ფლიტმა] საინტერესო პასუხი გაგვცა: ძველი ყაიდის ზოოპარკებში ხალხს ცხოველებისადმი ნაკლები პატივისცემა ჰქონდა. გახედავდნენ გისოსებში გამოკეტილ მაიმუნს და ერთმანეთს ეღლიცინებოდნენ, ნახე, შენი ნათესავიაო. ახალი კონცეფციის ზოოპარკებში, სადაც ცხოველებს აქვთ დიდი სივრცე, არ არსებობს ხელისშემშლელი ბარიერები და ცხოველები ბუნებრივთან მიახლოებულ გარემოში ბინადრობენ, ადამიანებს მეტი მოწიწება უჩნდებათ მათ მიმართ და დროს არა ლაზღანდარობაში, არამედ ცხოველის ძებნაში, დაკვირვებასა და თვალიერებაში ხარჯავენ", — წერს ზოოპარკის ადმინისტრაცია.