თავისუფალი დემოკრატების ყოფილი ლიდერი ირაკლი ალასანია, რუსთავი 2-ის გადაცემა არჩევანში პოლიტიკიდან დროებით წასვლის შემდეგ პირველად აძლევს ინტერვიუს.

მისი თქმით, 5%-იანი ბარიერი იმ პარტიებმა გადალახეს, რომლებსაც საკუთარი ტელევიზია ჰყავდათ, თუმცა არჩევნების შედეგები ამ ობიექტური მიზეზების გარდა, რამდენიმე შეცდომამაც განაპირობა:

"პარტიები, რომლებსაც ჰქონდათ მაღალი დაფინანსება და თავისი ტელევიზია, შევიდნენ პარლამენტში, თუმცა იყო შეცდომები, რომლებზეც სერიოზული დაფიქრებაა საჭირო, რატომ ვერ მოხერხდა კომუნიკაცია საზოგადოებასთან და იმ პროგრამის და განზრახვის მოსახლეობამდე მიტანა, რაც ჩვენს პარტიას ჰქონდა".

მან თქვა, რომ წინასაარჩევნოდ მის პარტიას არ ჰქონდა თავისი ტელევიზია და დიდი რესურსები, პროცესი კი დაპირისპირებების ფონზე წარიმართა. მან თავის ამომრჩეველს მადლობა გადაუხადა მხარდაჭერისთვის და "ღირებულებების პატივისცემისთვის".

ირაკლი ალასანიამ განაცხადა, რომ არჩევნების შედეგები ძალიან მტკივნეული იყო.