2016 წლის 5 ოქტომბერს, მასწავლებელთა პროფესიულ დღეს, ქუთაისში ინტენსიური განათლების ცენტრი გაიხსნა.

ახალ სივრცეში განათლების მიღება და კვალიფიკაციის ამაღლება ყველას შეუძლია. ცენტრი თანამშრომლობს ყველა დაინტერესებულ პირთან, რადგან სწავლა ნებისმიერ ასაკში გრძელდება.

"ინტენსიური განათლების ცენტრი მუდმივ სრულყოფასა და განახლებაზეა ორიენტირებული, რომელიც, როგორც ყველა ცოცხალი ორგანიზმი, გარემოსთან ადეკვატურად ალაგებს შიდა გარემოს. ინტერესთა მიხედვით ზრდის სამიზნე ჯგუფებს და ახორციელებს საზოგადოებისათვის ბევრად სინტერესო სამუშაოს", ამბობს ცენტრის დამაარსებელი ზაზა ლეკვეიშვილი On.ge-სთან საუბრისას.

ინტენსიური განათლების ცენტრში მომზადება შეუძლიათ როგორც მოსწავლეებს, ისე მასწავლებლებს. ახალ საგანმანათლებლო სივრცეში პროგრამების მრავალფეროვანი არჩევანია:

  • სხვადასხვა სასერტიფიკატო პროგრამები; (სხვადასხვა უმაღლეს სასწავლებლებთან ერთად და სასწავლო, ტრენინგ ცენტრებთან ერთად)
  • სპეციალური მოსამზადებელი პროგრამა პედაგოგებისთვის;
  • სასწავლო პროგრამები აბიტურიენტებისთვის;
  • სასწავლო პროგრამა საატესტატო გამოცდებისთვის;
  • პროგრამა სამაგისტრო გამოცდებისთვის.

დღეისთვის არსებული ინფრასტრუქტურით და გათვლილი პროგრამების მიხედვით, განათლების ინტენსიური ცენტრი 120-დან 150-მდე კურსანტის მომზადებას შეძლებს.

ცენტრი ასევე აწყობს თავისუფალ სივრცეს:

  • საკვირაო სკოლებისთვის;
  • სერტიფიცირებული ტრენერების მასტერკლასებისთვის;
  • ახალი სახელმძღვანელოების პრეზენტაციებისა და სახელმძღვანელოების ავტორებთან შეხვედრებისთვის;
  • საგანმანათლებლო სფეროში ნებისმიერი ინოვაციის განხილვისთვის.

განათლების ინტენსიური ცენტრი სხვადასხვა სოციალური პროექტების განხორციელებასაც გეგმავს. ამ მიმართულებით ის თანამშრომლებს აპირებს ახლომდებარე მუნიციპალიტეტებთან. სწორედ მათთან მოლაპარაკების საფუძველზე და მათი რეკომენდაციით განხორციელდება აღნიშნული პროექტი 2017 წელს.