18 ნოემბრის აქციაზე დაკავებული 17 პირის საქმე, რომელსაც მოსამართლე ვალერიან ფილიშვილი ცალ-ცალკე განიხილავდა, გადაიდო. მოსამართლის თანაშემწემ მათ უთხრა, რომ ყველა მათგანს ინდივიდუალურად აცნობებდნენ სხდომის ჩანიშვნის თარიღს.

მოსამართლემ ისინი გუშინ, 20 ნოემბერს 16 საათზე დაიბარა და მხოლოდ 8 საათის შემდეგ უთხრა, რომ მათ საქმეს დებდა. ესენი არიან: ირაკლი ფავლენიშვილი; ვლადიმერ ვართანოვი; გიორგი კოპალიანი; თორნიკე ჩაჩანიძე; შოთა მათითაიშვილი; ირაკლი მაისურაძე; ბესიკ ლიპარტელიანი; ალექსანდრე ლიპარტია; გიორგი მონავარდისაშვილი; დავით გეგიაძე; მიხეილ კაკაურიძე; დაჩი იმედაძე; ლევან ნოზაძე; გიორგი ეკიზაშვილი; ალექსანდრე მაცარაშვილი; იმედა კლდიაშვილი.

რაც შეეხება დანარჩენ 20 დაკავებულს, ისინი 3 ჯგუფად დაიყო, საიდანაც მოსამართლემ 2-ის საქმე განიხილა და გადაწყვეტილება აქვს გამოსაცხადებელი, მესამე ჯგუფის საქმის განხილვა კი ჯერ არ დაუწყია.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.