2019 წლის დასაწყისში ოფიციალურად დადასტურდა, რომ ერთ-ერთი ყველაზე ცნობილი სერიaლი Vikings მეექვსე სეზონით დასრულდებოდა, თუმცა სულ ახლახანს გახდა ცნობილი, რომ სერიალის ახალ სეზონს არა, თუმცა მის სიქველს გადაიღებენ.

Valhalla — ასე ერქმევა ახალ სერიალს, რომელიც ვიკინგებში განვითარებული მოვლენებიდან ასი წლის შემდგომ ისტორიას მოგვითხრობს. სიუჟეტი ძირათადად ისეთი ცნობილი ლეგენდარული გმირების დრამატულ თავგადასავლებზე მოგვითხრობს, როგორებიც არიან ლეიფ ერიქსონი, ფრეიდისი, ჰარალდ სიგურდოსონი და უილიამ დამპყრობელი.

ვიკინგების ლეგენდის ამ ახალ ისტორიაზე სერიალს ნეტფლიქსი გადაიღებს და უკვე წინასწარაა ცნობილი, რომ კომპანიამ ვალჰალასთვის 24 ეპიზოდი დაამტკიცა. სერიალის სცენარზე ჯებ სტუარტი იმუშავებს, შოუს პროდიუსერები კი მაიკლ ჰირსტი და მორგან ო'სალივანი იქნებიან.

"აღფრთოვანებული ვარ, რომ ვიკინგების საგა გრძელდება და დარწმუნებული ვარ, ამ ფაქტით კიდევ მილიონობით ფანია გახარებული მთელს მსოფლიოში. ჯებ სტუარტი შესანიშნავი სცენარისტია, რომელიც სრულიად ახალ ისტორიას შექმნის და განსხვავებული ხედვით წარმოაჩენს ცნობილ ვიკინგებს", - განაცხადა სერიალ ვიკინგების შემქმნელმა, მაიკლ ჰირსტმა.

მართალია, სერიალ ვიკინგების ბოლო, მეექვსე სეზონის პრემიერა 4 დეკემბერს შედგება და ამ სატელევიზიო შოუს მაყურებლები ჯერ სათანადოდ არ დამშვიდობებიან მას, თუმცა უკვე წინასწარ ვიცით, რომ ეს ლეგენდარული ისტორია არ სრულდება და წინ ახალი თავგადასავლებით სავსე შოუ გველის.