ცოტა ხნის წინ ამერიკელი რეპერი, კანიე ვესტი ტეხასში, ქალაქ ჰიუსტონში მდებარე ჯოილ ოსტინის ეკლესიაში სიტყვით საჯაროდ გამოვიდა და თავისი კარიერის შესახებ ისაუბრა.

როგორც ცნობილია, ორმოცდაორი წლის მომღერალი რამდენიმე თვის წინ მორწმუნე ქრისტიანი გახდა, რის გამოც თავისი გამოსვლის დიდი ნაწილი სწორედ რწმენაზე საუბარს დაუთმო:

"ვიცი, რომ ღმერთი დიდი ხნის განმავლობაში მიხმობდა, მაგრამ ეშმაკი მაინც ახერხებდა ჩემთვის ხელი შეეშალა. მაგრამ, როცა ყველაზე უბადრუკ მდგომარეობამდე დავეშვი, ღმერთი მაინც არ მტოვებდა და მუდმივად შთამაგონებდა."

მომღერლის განცხადებით, "ეშმაკმა ყველა კარგი პროდიუსერი, მუსიკოსი თუ დიზაინერი თავისკენ გადაიბირა", თუმცა მის შემთხვევაში ასე არ მომხდარა და ტრადიციულად, კანიე ვესტი ამჯერადაც არ მოერიდა საკუთარი თავი საქებარი სიტყვებით დაეხასიათებინა:

"ახლა კი, ყველაზე დიდებული ხელოვანი, ვინც კი ღმერთს ოდესმე შეუქმნია, სწორედ მას ემსახურება."

ცნობილმა რეპერმა 25 ოქტომბერს თავისი ახალი ალბომი Jesus Is King გამოუშვა, რომელმაც ჩარტები დაიპყრო და დადებითი შეფასებებიც დაიმსახურა. ახალი ალბომი სწორედ მომღერლის რელიგიური მოტივებითაა გაჯერებული და ძირითადად ქრისტიანული მუსიკის ჟანრს, გოსპელს წარმოადგენს.

სულ რამდენიმე საათის წინ კანიე ვესტმა დააანონსა, რომ 24 ნოემბერს საოპერო შესრულებასაც შემოგვთავაზებს, სახელწოდებით ნაბუქოდონოსორი.