სახალხო დამცველი, ნინო ლომჯარია აცხადებს, რომ პარლამენტის პიკეტირება არ არის კანონიერი, თუმცა ამ უკანონობაზე პასუხისმგებელნი არიან ის დეპუტატები, ვინც პროპორციულ საარჩევნო სისტემას მხარი არ დაუჭირეს. ამის შესახებ მან ფეისბუქზე დაწერა.

"უფრო დიდი უკანონობა ის მგონია, ხალხს უთხრა, ვისაც მხარს დაუჭერ, იმას პარლამენტში არ შევუშვებო, პარტიებს უთხრა, იმ რაოდენობით არ შეგიშვებ პარლამენტში, რა მხარდაჭერაც გაქვსო და შესაბამისად, როდესაც ოპოზიციას, ახალ პოლიტიკურ ძალებს არ აძლევ პარლამენტში შესვლის შესაძლებლობას, არც ისინი შეგიშვებენ პარლამენტში.

პოლიტიკურ კრიზისს სწორედ მაჟორიტარული სისტემა ქმნის და ამის დასტურია დამოუკიდებელი საქართველოს პოლიტიკური ისტორია. მაჟორიტარებს კი თუ თვითმმართველობების პრობლემები აწუხებდათ, დეცენტრალიზაციის რეფორმა უნდა გაეტარებინათ, იმიტომ არიან ისინი პარლამენტში, რომ პოლიტიკური რეფორმები გაატარონ და არა იმიტომ, რომ გზები დააგონ, მილები ჩაყარონ, ან სკოლები არემონტონ", — წერს ნინო ლომჯარია.

დღეს, 17 ნოემბერს პარლამენტის წინ სხვადასხვა ოპოზიციური პარტიისა და სამოქალაქო მოძრაობის მიერ ორგანიზებული საპროტესტო აქცია გაიმართა. პარალელურად პატრიოტთა ალიანსის ორგანიზებული აქცია მიმდინარეობდა რესპუბლიკის მოედანზე.

ევროპულმა საქართველომ და ნაციონალურმა მოძრაობამ საკანონმდებლო ორგანოს პიკეტირება დააანონსეს. დემონსტრანტები აცხადებენ, რომ ორშაბათიდან პარლამენტში ქართულ ოცნების ვერც ერთი დეპუტატი ვეღარ შევა. მათ შენობის შესასვლელებთან კარვები გაშალეს და სიმბოლურად ბოქლომები დაკიდეს.

საპროტესტო აქციები მას შემდეგ განახლდა, რაც 14 ნოემბერს ქართული ოცნების დეპუტატებმა პარლამენტში პროპორციული საარჩევნო სისტემის კანონპროექტი ჩააგდეს. მანამდე ბიძინა ივანიშვილი მოსახლეობას პირდებოდა, რომ 2020 წლის არჩევნები პროპორციული საარჩევნო სისტემით და ნულოვანი ბარიერით ჩატარდებოდა.