BBC-ს ჟურნალისტი რუპერტ ვინგფილდ-ჰეიზი და მისი გუნდი ჩრდილო კორეაში რეპორტაჟის შინაარსის გამო დააკავეს.

გამომცემლობის ინფორმაციით, მათი ჟურნალისტი, პროდიუსერი და ოპერატორი პარასკევს აეროპორტში დააკავეს, როდესაც ისინი ჩრდილო კორეას ტოვებდნენ.

BBC-ს ჟურნალისტი და ოპერატორი ჩრდილოეთ კორეის დედაქალაქ ფხენიანში დაკავებამდე ცოტა ხნით ადრე.

ფოტო: Will Ripley / Twitter

ჟურნალისტს კორეის ოფიციალური პირები 8 საათის განმავლობაში კითხავდნენ. შაბათ-კვირას მედიის თანამშრომლები ქვეყანაში დააყოვნეს და მხოლოდ რამდენიმე საათის წინ მისცეს ქვეყნის დატოვების უფლება.

BBC-ს გუნდი ჩრდილო კორეაში მუშათა პარტიის კონგრესის გასაშუქებლად იყო ჩასული და ნობელის პრემიის ლაურეატების დელეგაციას ახლდა, რომლებიც ქვეყანაში კვლევის ჩასატარებლად იყო ჩასული.

BBC-ს ინფორმაციით, ჩრდილოეთ კორეის მთავრობა უკმაყოფილო დარჩა ჟურნალისტის რეპორტაჟებში გაშუქებული დედაქალაქის თემებით.