პატრიოტთა ალიანსის ლიდერი ირმა ინაშვილი პარლამენტის ყოფილ თავმჯდომარეს, ირაკლი კობახიძეს იუსტიციის ყოფილ მინისტრს, ზურაბ ადეიშვილს ადარებს.

"ახალი ზურაბ ადეიშვილია ირაკლი კობახიძე და მუდმივად იტყუება. თითქოს არც გერმანული მოდელის მიღება შეიძლება, არც პატრიოტების ინიციატივის გათვალისწინება. ტყუილია ეს ყველაფერი", — განაცხადა ინაშვილმა რუსთავი 2-თან საუბრისას.

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი. 2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა. ადეიშვილმა ქვეყანა ქვეყნის თავისუფლების შეცვლისთანავე დატოვა.

მან კიდევ ერთხელ დაადასტურა, რომ პატრიოტთა ალიანსის აქცია არავის არ უერთდება და მარტონი გააპროტესტებენ ქვეყანაში არსებულ ვითარებას და პროპორციული საარჩევნო სისტემის კანონპროექტის ჩაგდებას. მისივე თქმით, აქციები პერმანენტულად ჩატარდება მთელი ქვეყნის მასშტაბით.

დღეს, 17 ნოემბერს, 15 საათზე პარლამენტთან საპროტესტო აქცია. აქციის ორგანიზატორები სხვადასხვა სამოქალაქო მოძრაობა და ოპოზიციური პარტიები არიან. გარდა ამისა, 17 საათზე პატრიოტთა ალიანსის ორგანიზებით საპროტესტო აქცია დაიწყება რესპუბლიკის მოედანზე.

მთელი ოპოზიციური სპქეტრი და სამოქალაქო საზოგადოება პროპორციული საარჩევნო სისტემის კანონპროექტის ჩაგდებას აპროტესტებს და ვადამდელ საპარლამენტო არჩევნებს მოითხოვს.

პარლამენტში შენობაში უკვე განლაგებულია გაძლიერებული საპოლიციო ძალები. საკანონმდებლო ორგანოში სპეცრაზმმა იარაღიც შეიტანა. საპატრულო პოლიციის უფროსი, ვაჟა სირაძე ამბობს, რომ პარლამენტში ცეცხლსასროლი იარაღი არ არის.