ამერიკის შეერთებული შტატების კონგრესში საქართველოს მეგობართა ჯგუფის თანათავმჯდომარე, ადამ კინზინგერი პროპორციული სისტემის პროექტის ჩავარდნას ეხმაურება და აცხადებს, რომ "შოკირებულია" მომხდარით. კინზინგერი განცხადებას თავის ოფიციალურ ვებგვერდზე ავრცელებს, სადაც ის წერს, რომ საკონსტიტუციო რეფორმის ჩავარდნა პუტინისთვის საჩუქარია:

"ეს გაანადგურებს საქართველოს პროგრესს, რომელიც მიღწეულია აგრესიული და თავდამსხმელი მეზობლის, რუსეთისგან სრული დამოუკიდებლობის მოსაპოვებლად".

ადამ კინზინგერი გასულ კვირას ბათუმში, თავდაცვისა და უსაფრთხოების კონფერენციას ესწრებოდა. ის იხსენებს, რომ ვიზიტისას კმაყოფილი დარჩა, რადგან ეს რეფორმა გარდაუვალი ჩანდა.

"ეს ვალდებულება ხელისუფლებას საერთაშორისო საზოგადოებამ და უფრო მეტიც, ქართველმა ხალხმა დააკისრა. იმედი მაქვს ეს სიტუაცია გამოსწორდება, და გამოსწორდება ძალიან მალე. როდესაც რეგიონს ვუყურებთ, მნიშვნელოვანია, დავიმახსოვროთ რომ რუსეთი კრახს განიცდის თავისი რეპრესიული მმართველობის გამო. საქართველო არ არის რუსეთი და ქართველი ხალხი ითხოვს და იმსახურებს იმაზე მეტს, ვიდრე ეს პარლამენტმა აჩვენა", — წერს კონგრესმენი.

ადამ კინზინგერი, როგორც საქართველოს მეგობართა ჯგუფის თანათავმჯდომარე კონგრესში მოუწოდებს საქართველოს ხელისუფლებას, განაახლოს მოლაპარაკებები დაუყოვნებლივ და "გაიტანოს ეს მნიშვნელოვანი რეფორმა":

"ქართველებს სურთ ხალხის მთავრობა, მთავრობა ხალხისთვის და ხალხის მიერ. მათ სურთ მთავრობა, რომელიც უფრო მეტად უკავშირდება დასავლეთს და რომელიც აღიარებული იქნება, როგორც ნატოს მოკავშირე".

14 ნოემბერს ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. სწორედ ამ მიზეზის გამო რამდენიმე ათასი ადამიანი რუსთაველის გამზირზე შეიკრიბა.