ქართული ოცნების დეპუტატი, ირაკლი კობახიძე ფრაქციის ლიდერს ეთანხმება და ამბობს, რომ დეპუტატები ღილაკზე ხელის მიმჭერები აღარ არიან. ამ შინაარსის განცხადებებით მამუკა მდინარაძე და პარლამენტის ყოფილი თავმჯდომარე იმ დეპუტატებს გამოეხმაურნენ, რომლებმაც პროპორციულ საარჩევნო სისტემას მხარი არ დაუჭირეს.

"ჩვენს გუნდში გვქონია არაერთი პროცესი, სადაც, საბოლოო ჯამში, მიღებულ იქნა ისეთი გადაწყვეტილება, რომელიც არ შეესაბამებოდა, თუნდაც უმრავლესობის გადაწყვეტილებას. ეს არის შიდა დემოკრატიული პროცესი. ერთ-ერთი მიღწევა, რაც გვაქვს 2012 წლის შემდეგ არის ის, რომ მათ შორის დეპუტატები აღარ არიან ღილაკის მიმჭერები", — თქვა ირაკლი კობახიძემ.

ირაკლი კობახიძემ და მამუკა მდინარაძემ, ასევე, აღნიშნეს, რომ ვადამდელი არჩევნები არ იქნება და ქვეყანა 2020 წლის არჩევნებისთვის უნდა მოემზადოს. პარლამენტის ყოფილმა თავმჯდომარემ ის საკითხებიც გაიხსენა, რაზეც გუნდში წარსულშიც არსებობდა განსხვავებული აზრი, მაგალითად კვოტირების საკითხი და სასამართლო ხელისუფლება.

დღეს, 14 ნოემბერს ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. კანონპროექტის ჩაგდების შემდეგ გადაიკეტა რუსთაველის გამზირი და ჩაინიშნა ოპოზიციური პარტიების საერთო ბრიფინგი.