Netflix-ზე გადასული ამერიკული ფსიქოლოგიური თრილერი You მეორე სეზონით 26 დეკემბერს დაბრუნდება. სიახლე შოუს მაყურებელს მთავარი გმირის, ჯო გოლდბერგის შემსრულებელმა, პენ ბეჯლიმ ამცნო.

"მოემზადე ახალი დასაწყისისთვის", — დაწერა მან ტვიტერზე.

როგორც უკვე მიხვდით, სერიალის მთავარი გმირი კვლავ ფსიქოპატი ჯო გოლდბერგია, რომელიც, პირველი სეზონში ჩადენილი საშინელი დანაშაულების შემდეგ ნიუ-იორკიდან ლოს-ანჯელესში გადადის. სერიალში ახალი სახეებიც გამოჩნდებიან, მათ შორის Haunting of Hill House-ის მსახიობი ვიქტორია პედრეტი.

როგორც შოუს შემქნელმა, სარა გეიმბლმა აგვისტოში თქვა, ახალი სერიები წინაზე უფრო საშიში და ავისმომასწავებელი იქნება:

"მეორე სეზონი წინაზე უფრო საშიშია. ის თქვენს მოლოდინებს გააორმაგებს".

შოუს შემქნელმა დასძინა, რომ მეორე სეზონში მთავარ პერსონაჟს ბევრი ისეთი გადაწყვეტილების მიღება უწევს, რაც თავადაც არ მოსწონს.

ნიუ-იორკში გადაღებული პირველი სეზონი 2018 წლის სექტემბერში გამოვიდა და ის ქეროლაინ კეპნესის იმავე სახელწოდების წიგნზეა დაფუძნებული. მეორე სეზონი იგივე ავტორის 2016 წლის სიქველზე, Hidden Bodies არის აგებული, თუმცა ის, ვისაც წიგნი წაკითხული აქვს, სერიალში ცვლილებებს უნდა ელოდოს.