სირიის პრეზიდენტმა ბაშარ ალ ასადმა რუსეთის სახელისუფლებო გამოცემა კამსამოლსკაია პრავდას ექსკლუზიური ინტერვიუ მისცა, სადაც სირიაში შექმნილ სიტუაციასა და შესაძლო შედეგებზე ისაუბრა.

კამსამოლსკაია პრავდას ჟურნალისტმა პირველი კითხვაში გამოთქვა მოსაზრება, რომ სირიის მოვლენები, შესაძლოა მესამე მსოფლიო ომის დასაწყისია:

"სიტუაცია სირიაში უფრო საშიში და არაპროგნოზირებადი ხდება. კონფლიქტი ითრევს უფრო ბევრ მონაწილესა და მოთამაშეს. მაგალითად, ვინ იბრძვის ახლა სირიაში? ირანი, ლიბანი (ვგულისხმობ ჰეზბოლას), რუსეთი, თურქეთი, კოალიცია აშშ–ს ხელმძღვანელობით. ჩინეთიც ახდენს საკუთარი ინტერესის დემონსტრირებას. გაწუხებთ თუ არა ის, რომ ეს კონფლიქტი გადაიზრდება მესამე მსოფლიო ომში, თუ ეს უკვე არის მესამე მსოფლიო ომი?"

რუსული სახელისუფლებო მედიის ჟურნალისტის მინიშნებას სირიის პრეზიდენტი დაეთანხმა და უპასუხა, რომ მთავარი ის კი არ არის, ვინ ერევა სირიის კონფლიქტში, არამედ ის, ვინც მხარს უჭერს ტერორისტებს.

ბაშარ ასადი უკვე 5 წელია ებრძვის ამბოხებულებს სირიაში, რომელსაც მხარდაჭერას დასავლური ქვეყნები აშშ–ს მეთაურობით უცხადებენ.

ბაშარ ასადის თქმით, სირიის ტერიტორიაზე ჰეზბოლა, ირანი და რუსეთი ლეგალურად იმყოფებიან, რადგან ისინი სირიის პარტნიორები არიან, ხოლო სხვა ქვეყნები, ტერორისტების მხარდამჭერები არიან:

"რაც შეეხება მესამე მსოფლიო ომს, ამ ტერმინს ბოლო დროს ხშირად იყენებენ, განსაკუთრებით სირიის კონფლიქტის ესკალაციის შემდეგ. დღეს ჩვენ ვაკვირდებით სიტუაციას, რომელიც ძალიან ჰგავს ცივი ომის პერიოდის საწყის ეტაპს. ეს გამოჩნდა არც ისე დიდი ხნის წინ, რადგან ვფიქრობ, რომ დასავლეთმა, განსაკუთრებით კი აშშ–მ, არ შეაჩერა ცივი ომი საბჭოთა კავშირის დაშლის შემდეგაც კი.

ჩვენ ვხედავთ დღეს სიტუაციის ესკალაციას, რომლის მთავარი მიზანი აშშ–ს ჰეგემონიის შენარჩუნებაა საერთაშორისო არენაზე. ამიტომ ომის სუნი, რომელიც თქვენ მესამე მსოფლიო ომს შეადარეთ, ჰაერში იგრძნობა, მაგრამ ეს ჯერ კიდევ არ არის პირდაპირი სამხედრო შეტაკება, რადგან ის შედგება სამხედრო, პოლიტიკური და ტერორისტული კომპონენტისგან. ამიტომ, თქვენ სწორი ხართ თქვენს შეგრძნებებში, თუმცა სირია მხოლოდ ნაწილია ამ ომის".

კამსამოლსკაია პრავდას ჟურნალისტმა ასადს ასევე ჰკითხა, ეთანხმება თუ არა იმას, რომ სირია გადაიქცა აშშ–სა და რუსეთის ომის ადგილად, რასაც სირიის პრეზიდენტი დაეთანხმა. მისი მოსაზრებით, რუსეთი აცნობიერებს ტერორიზმის საფრთხეს და ამიტომ ებრძვის მას, აშშ კი მხარს უჭერს ტერორისტებს.