თბილისის სააპელაციო სასამართლოში ე.წ. კაბელების საქმის სასამართლო პროცესი მიმდინარეობს. ჟურნალისტების შეკითხვას, როგორ აპირებს თავისუფალი დემოკრატების უკვე ყოფილი ლიდერი, ირაკლი ალასანია საქმეზე ბრალდებული პირების მხარდაჭერისთვის ბრძოლას, ალასანიამ უპასუხა:

"ჩვენ ერთად, ბოლომდე გავაგრძელებთ ბრძოლას იმისთვის, რომ გამოვიხსნათ პოლიტიკური პატიმრები ტყვეობიდან. ყველა სამართლებრივი ფორმა და საზოგადოებრივი საქმიანობა იქნება ორგანიზებული იმისთვის, რომ, რაც შეიძლება სწრაფად უდანაშაულო ბიჭები, რომლებიც ციხეში მხოლოდ პოლიტიკური ნიშნით გაუშვეს, ძალიან მალე დაუბრუნდნენ საკუთარ ოჯახებსა და სახლებს. ეს ის საქმეა, სადაც ყველანი ვართ ერთსულოვანი".

ჟურნალისტების შეკითხვებს იმასთან დაკავშირებით, თუ რა პროცესები მიმდინარეობს თავისუფალ დემოკრატებში, ალასანიამ უპასუხა, რომ სამშაბათს მას ვიდეო-კონფერენცია ექნება და იქ იტყვის ყველაფერს.

დღეს ე.წ. კაბელების საქმის სააპელაციო სარჩელის განხილვა თბილისის სააპელაციო სასამართლოში განახლდა.

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

უფრო მეტი იხილეთ აქ:

კაბელების საქმე: დეტალები მოკლედ