დღეს ე.წ. კაბელების საქმის სააპელაციო სარჩელის განხილვა თბილისის სააპელაციო სასამართლოში განახლდა. სასამართლოს შენობაში უკვე იმყოფებიან თავისუფალი დემოკრატების ყოფილი და ახლანდელი ლიდერები, მათ შორის ალექსი პეტრიაშვილიც, რომელმაც სასამართლო სხდომაზე შესვლამდე განაცხადა:

"განსაკუთრებული მოლოდინი არ მაქვს. მე მოვედი აქ როგორც რიგითი მოქალაქე იმისთვის, რომ მხარი დავუჭირო 5 უდანაშაულო მოქალაქეს. დიდი იმედი მაქვს, რომ საბოლოოდ, გამართლდებიან და დაუბრუნდებიან ოჯახებს, ჩვეულებრივი ცხოვრების რიტმს".

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

კაბელების საქმეზე უფრო მეტი შეგიძლიათ იხილოთ აქ:

კაბელების საქმე: დეტალები მოკლედ