გენერალური პროკურორი შალვა თადუმაძე ამბობს, რომ თუ პრეზიდენტის გამოკითხვის საჭიროება დადგება, კანონის შესაბამისად იმოქმედებენ. მისი თქმით, ჯერ მიმდინარეობს იმ პირების გამოკითხვა, რომლების "აუცილებლობაც არის".

დამაზუსტებელი კითხვაზე, არაერთი გამოკითხვის შემდეგ იკვეთება თუ არა ვინმეს პასუხისმგებლობა, თადუმაძე იმეორებს, რომ როცა ეს საკითხი დადგება, შესაბამისად იმოქმედებენ.

პრეზიდენტის დაკითხვის შესახებ საზოგადოებაში კითხვები მაშინ გაჩნდა, რაც ცნობილი გახდა, რომ მან მკვლელობასა და ნარკოდანაშაულში ბრალდებული პირები შეიწყალა. 14 ოქტომბერს პრეზიდენტმა სალომე ზურაბიშვილმა განაცხადა, რომ შეწყალების საქმის ფარგლებში პროკურატურას ის არ გამოუკითხავს. მცხეთაში სვეტიცხოვლობაზე მისულ პრეზიდენტს ამ საკითხზე დაუსვეს შეკითხვები. კითხვაზე, იყო თუ არა პროკურატურაში გამოკითხვაზე, პრეზიდენტი პასუხობს, "არა, რატომ უნდა ვიყო". სხვა დამატებითი კითხვები მან უპასუხოდ დატოვა.

პატიმრების შეწყალების საქმე

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

მანამდე ინფორმაცია გავრცელდა, რომ ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

ამასთანავე, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

18 სექტემბერს ევროპულ საქართველოში ბრიფინგი გაიმართა, სადაც ირმა ნადირაშვილმა თქვა, რომ პრეზიდენტის ადმინისტრაციაში შეწყალებასთან დაკავშირებული საქმეები უშუალოდ საპარლამენტო მდივნის, დიმიტრი გაბუნიას შუამდგომლობით გვარდება. 20 სექტემბერს კი პროკურატურამ სალომე ზურაბიშვილის მიერ პატიმრების შეწყალების საქმეზე გამოძიება დაიწყო და გამოკითხვაზე ნადირაშვილი დაიბარა.

ამ ბრალდებასთან დაკავშირებით გაბუნიამ თქვა, რომ შეწყალების საქმესთან მას კავშირი არ აქვს. მოგვიანებით კი განაცხადა, რომ შესაწყალებელთა სია ადმინისტრაციის უფროსის მოადგილემ შეადგინა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მსჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს. 18 სექტემბერს მან შეწყალებაზე მორატორიუმი გამოაცხადა.