როგორც ცესკოს პრესსპიკერმა, ანა მიქელაძე On.ge-ს განუმარტა, ბათუმის 58-ე საარჩევნო უბანზე ამომრჩეველთა ხმებს გადაითვლიან, ხოლო ზუგდიდის 79-ე (ჯიხაშკარი), 39-ე (განმუხური) და 108-ე უბნებზე განმეორებითი არჩევნები ჩატარდება.

8 ოქტომბრის საპარლამენტო არჩევნების მიმდინარეობისას, სოფელ ჯიხაშკარის N66-ე ოლქის N79-ე და N108-ე საარჩევნო უბნებზე გაურკვეველი პირები შეიჭრნენ და დაარბიეს. რაც შეეხება 39-ე უბანს, მიქელაძის განმარტებით, ამ უბანზე გარკვეულ პროცედურულ ხარვეზებსა და დარღვევებს ჰქონდა ადგილი.

ცესკოს ბოლო ინფორმაციის თანახმად, ყველა საარჩევნო უბნის მონაცემები დათვლილია, ხოლო არჩევნების შედეგების საბოლოო შეჯამება უნდა დასრულდეს არაუგვიანეს 27 ოქტომბრისა. ამასთან, არჩევნების მეორე ტური, კანონმდებლობის თანახმად, ინიშნება პირველი ტურის შედეგების შეჯამებისას და მეორე ტურის გამართვის ბოლო ვადა მიმდინარე წლის 2 ნოემბერია.

უწყების ინფორმაციით, არსებული წინასწარი მონაცემებით, მეორე ტურები გაიმართება 50 მაჟორიტარულ ოლქში, თუმცა საბოლოო მონაცემები ცნობილი იქნება კანონით განსაზღვრული შესაბამისი პროცედურების დასრულების შემდეგ:

"არჩევნებში მონაწილეობა მიიღო - 1814276-მა ამომრჩეველმა, აქედან 51.1 პროცენტი (927069) ქალია, ხოლო 48.9 პროცენტი (887207) კაცი".

რაც შეეხება საჩივრებს, მათი შეტანის ვადა 11 ოქტომბრის საღამოს 6 საათზე ამოიწურა და პროცედურის თანახმად, საოლქო საარჩევნო კომისია საჩივრებს განიხილავს მათი რეგისტრაციიდან 2 დღის ვადაში, ხოლო საოლქო საარჩევნო კომისიების განაკარგულებები შესაძლოა გასაჩივრდეს სასამართლოში.