ლელოს დამფუძნებელი და ანაკლიის კონსორციუმის სამეთვალყურეო საბჭოს ყოფილი წევრი, მამუკა ხაზარაძე იხსენებს, რომ მთავრობა მსხვილი ამერიკული კომპანიის ანაკლიაში ინვესტირებას არ მიესალმა. ამაზე ხაზარაძემ მთავარ არხზე, გადაცემა ღამის მთავარში ისაუბრა:

"დეკემბერში ერთ-ერთმა უზარმაზარმა ამერიკულმა საინვესტიციო კომპანიამ, რომელსაც აქვს 40 მილიარდი მართვაში, დაამთავრა ანაკლიის თემის შესწავლა და პრინციპული თანხმობა გვითხრა ინვესტიციის ჩადებაზე. ვხვდები ამ კომპანიის თავმჯდომარეს ნიუ იორკში, ვთანმდებით, ისინი ხდებიან ჩვენი სტრატეგიოლი პარტნიორები ანაკლიაში და სხვა პროექტებშიც... მესამე კვირას გვითხრეს, რომ ხვდებიან ხელისუფლების წარმომადგენლებს. გვითხრეს რომ ხელისუფლებამ მართო შეხვედრა თხოვათ. შემდეგ თქვეს, ჩვენ გვითხრესო, რომ you're not welcome here. (თქვენს ინვესტიციას არ მივესალმებით). ამერიკელებს უთხრეს, თავი შეიკავეთ ინვესტირებისგანო. ამის მერე გამოდის პომპეო და ძალიან მკაცრ განცხადებას აკეთებს ანაკლიაზე. მეორე დილას, იგივე პიროვნება, ამ კომპანიის გენერალური დირექტორი გვირეკავს ვაშინგტონიდან და გვეუბნება, შევხვდი დილით პრემიერ ბახტაძეს, და გვითხთრეს, მწვანე გაქვთ ანთებულიო. ამის მერე ხდება ბრალის წაყენება ჩვენზე, უკვე სამი ბრიფინგი ჩატარებულია, მთელ მსოფლიოს უთხრეს, ბადრიმ [ჯაფარიძემ] და მამუკამ [ხაზარაძემ] ფული გაათეთრესო".

დღეს, 15 ოქტომბერს ანაკლიის განვითარების კონსორციუმის ხელმძღვანელმა ლევან ახვლედიანმა განაცხადა, რომ მთავრობამ ანაკლიის პროექტის "საბოტაჟირება მოახდინა" ბოლო რამდენიმე თვის და კვირის განმავლობაში. მისივე თქმით, მათ 10 ოქტომბერს ჩააბარეს დოკუმენტაცია, სადაც კონკრეტული ხედვები იყო წარმოდგენილი და დღეს ისინი აღარანაირი დოკუმენტაციის ჩაბარებას აღარ აპირებენ.

ლევან ახვლედიანის თქმით, კულუარებში მთავრობამ არერთხელ დააფიქსირა პოზიცია, რომ "ანაკლია არაა რენტაბელური" ან "კომერციულად გამართლებული".

დოკუმენტაციის წარდგენის ვადის ამოწურვამდე რამდენიმე საათით ადრე ინფრასტრუქტურის მინისტრმა, მაია ცქიტიშვილმა ბრიფინგზე განაცხადა, რომ კონსორციუმის წარდგენილი დოკუმენტაცია მათთვის დამაკმაყოფილებელი არ არის.

ამავე თემაზე: