ორგანიზაცია საფარის ხელმძღვანელი და თამთა თოდაძის ადვოკატი, ბაია პატარაია ამბობს, რომ ადვოკატ მარიამ კუბლაშვილთან დებატებში მონაწილეობას არ მიიღებენ. მისივე თქმით, დებატები თამთა თოდაძის დისკრედიტაციას ემსახურება.

"მარიამ კუბლაშვილს რომ რაღაც სანახაობების მოწყობა უნდა ეთერში, ეს არც მართლმსაჯულების ინტერესებში შედის და არც დაზარალებულის ინტერესებში. როგორც ჩანს, ამ ადვოკატს საერთოდ არ გაეგება მსხვერპლის ფსიქოლოგიური მდგომარეობა და ადვოკატის ეთიკა რას ნიშნავს", — უთხრა პატარაიამ On.ge-ს.

მისივე თქმით, ისინი არ აპირებენ კუბლაშვილის ბრალდებებს ლეგიტიმაცია მისცენ და "ეთერში თავი იმართლონ".

"თამთა თოდაძის წინააღმდეგ არა მხოლოდ კუბლაშვილი არამედ მთელი სუსი და ტროლების ფაბრიკაა ჩართული და ცდილობენ, ამ ადამიანის დისკრედიტაცია მოახდინონ. უვრცელებენ ათასგვარ ჭორს, რომელიც სიმართლეს არ შეესაბამება. ახალ კიდევ ეს არ კმარა და უნდათ, რომ თამთა გამოდგეს და თითოეულ ასეთ მოგონილ ჭორზე თავი იმართლოს", — აღნიშნა პატარაიამ.

სექსუალურ ძალადობაში ბრალდებული დეპუტატის, ილია ჯიშკარიანის ადვოკატმა, მარიამ კუბლაშვილმა სავარაუდო მსხვერპლი, თამთა თოდაძე და მისი ადვოკატი სატელევიზიო დებატებში 14 ოქტომბერს გამოიწვია.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.