"დღეს დგას დღის წესრიგში ვენახი, ხვავი და ბარაქა და ეს არაჩვეულებრივი ზეიმი. მეტი არაფერი დღეს არ არის დღის წესრიგში", — ასე უპასუხა საქართველოს პრეზიდენტმა, სალომე ზურაბიშვილმა მთავარი არხის ჟურნალისტის კითხვას იმაზე, გეგმავს თუ არა რუსეთის ფედერაციის პრეზიდენტთან შეხვედრას. ჟურნალისტს აინტერესებდა საგარეო საქმეთა მინისტრების შემდეგ დადგა თუ არა დღის წესრიგში პრეზიდენტების შეხვედრის საკითხი.

მსგავსი ფორმით უპასუხა პრეზიდენტმა დღეს, 12 ოქტომბერს დასმულ სხვა კითხვებსაც. მაგალითად, კითხვაზე, დაკითხეს თუ არა შეწყალების საქმეზე ზურაბიშვილმა თქვა: "სხვა კითხვებზე დღეს არ ვპასუხობ. დღეს ვპასუხობ იმაზე, რაც არის დღეს. შესანიშნავი... და გთავაზობთ, რომ თქვენც ისიამოვნოთ".

ნიუ იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.

25 სექტემბერს ლავროვმა საქართველოსთან ავიამიმოსვლის აღდგენის სურვილი გამოთქვა. მისი თქმით, ამის მიზეზი ისაა, რომ "საქართველოში უმრავლესობამ მართლმადიდებლობის საპარლამენტო ასამბლეაზე რუსეთის წინააღმდეგ პროვოკაციის კონტრპროდუქტიულობა გააცნობიერა".

მოგვიანებით ლავროვმა თქვა ისიც, რომ შეხვედრა საქართველოს საგარეო საქმეთა მინისტრთან შეხვედრა თავად მინისტრმა ითხოვა. საქართველოს საგარეო უწყება კი ამტკიცებს, რომ ინიციატორი შვეიცარიის საელჩო იყო.