ეკონომიკის მინისტრის, ნათია თურნავას თქმით, გლობალური კონკურენტუნარიანობის ინდექსში საქართველოს ადგილი, არა მდგომარეობის გაუარესებამ, არამედ, მეთოდოლოგიის ცვლილებამ გამოიწვია. ამის შესახებ მინისტრმა TV პირველთან პირდაპირი სატელევიზიო ჩართვის დროს განაცხადა.

გლობალური კონკურენტუნარიანობის ინდექსის თანახმად, საქართველოს პოზიცია, შარშანდელთან შედარებით რვა საფეხურით შემცირდა და ის 141 ქვეყანას შორის 74-ე ადგილს იკავებს. ინდექსის თანახმად, წინა წელთან შედარებით საქართველოს ქულა 0,3 პუნქტით შემცირდა.

მინისტრი ამტკიცებს, რომ საქართველოს შეფასება არ გაუარესებულა და ქვეყანა კვლავ 61 ქულით ფასდება, "რაც საკმაოდ მაღალი მაჩვენებელია". ნათია თურნავას სხვა ევროპული ქვეყნები მოჰყავს მაგალითად, რომ ცვლილება მათაც შეეხოთ, თუმცა, სინამდვილეში, ქვეყნის შიგნით მდგომარეობა არ გაუარესებულა:

"ეს საქართველოსთან ერთად, შეეხო სხვა ქვეყნებსაც - მაგალითად, გერმანიამ მესამე ადგილიდან მეშვიდეზე გადაინაცვლა, ასეთივე ცვლილება შეეხო ჩეხეთს, საბერძნეთს და მთელ რიგ განვითარებულ ქვეყნებს. ეს არ ნიშნავს, რომ მათ რაიმე გააუარესეს ქვეყნის შიგნით - ისინი ისევ მოწინავე ევროპული ქვეყნები არიან, უბრალოდ მოხდა მეთოდოლოგიური ცვლილება".