ქალთა უფლებადამცველი ბაია პატარაია აცხადებს, რომ პროკურატურა არ ასრულებს ვალდებულებას თამთა თოდუაძის საქმეზე, რომელიც ოცნების დეპუტატს, ილია ჯიშკარიანს სექსუალურ ძალადობაში ადანაშაულებს. ის მოუწოდებს მთავარ პროკურორს, შალვა თადუმაძეს, რომ საქმის პროკურორს "მუშაობის საშუალება მისცეს".

"პროკურატურა არის სრულიად უმოქმედოდ და გაჩერებული. არსებობს საქმეში საკმარისი მტკიცებულება, რომ ბრალი წაუყენონ ადამიანს, მაგრამ ამას პროკურატურა არ აკეთებს. მე მინდა მივმართო შალვა თადუმაძეს, მისცეს მუშაობის საშუალება პროკურორს. მე დარწმუნებული ვარ, ეს საქმე წყდება მთავარი პროკურორის დონეზე და ხელოვნურად არის გაჩერებული", — განაცხადა მან.

პატარაიას თქმით, არავის მისცემენ იმის საშუალებას, რომ ეს საქმე ხელოვნურად ჩაიფარცხოს. მისივე თქმით, დღეს 7 საათზე მთავარ პროკურატურასთან საპროტესტო აქციას გამართავენ.

თბილისის საკრებულოში ქართული ოცნების დეპუტატს, ილია ჯიშკარიანს თანამშრომელი, თამთა თოდაძე სექსუალურ და ფიზიკურ ძალადობაში ადანაშაულებს. ძალადობის სავარაუდო მსხვერპლი მთავარ არხთან ყვება, რომ ჯიშკარიანმა მასზე სექსუალური ძალადობა სცადა, როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ გამოძიება სამი მუხლით დაიწყო.

თამთა თოდაძის დედის თქმით, ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძეს პროკურატურამ დაზარალებულის სტატუსი ამ დრომდე არ მიანიჭა. როგორც მისი ადვოკატი თამუნა ლეკავა ამბობს, უწყებაში ექსპერტიზის დასკვნას ელოდებიან. მისი განმარტებით, სტატუსის გარეშე საქმის მასალებზე წვდომა არ აქვთ. მისივე თქმით, ხვალ, 7 ოქტომბერს დაზარალებულის სტატუსის მინიჭებისთვის ისინი პროკურატურას წერილობით მიმართავენ.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისივე თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამუნა თოდაძის განცხადებით, პოლიციის მოქმედებებთან დაკავშირებით გენერალურ პროკურატურასაც მიმართავენ.