თბილისის მერს, კახა კალაძეს მიაჩნია, რომ გამოძიების მიმდინარეობისას საკრებულოს ქართული ოცნების დეპუტატმა, ილია ჯიშკარიანმა მანდატი არ უნდა დატოვოს.

"თუ მას დაუმტკიცდება, კანონის წინაშე უნდა აგოს პასუხი. ვფიქრობ, ჯერ არ უნდა დატოვოს, რადგან ეს შეიძლება, იყოს არასწორი ინფორმაცია, ამიტომ დაველოდოთ გამოძიებას. თუ მას დაუმტკიცდება და ასეთი რამე აქვს ჩადენილი, ჩემთვის როგორც კაცისთვის, ადამიანისთვის, ქალაქის მერისთვის, არის ძალიან მძიმე", — კალაძის შეფასებას პირველი არხი ავრცელებს.

ჯიშკარიანის საქმეზე კალაძემ 5 ოქტომბერსაც ისაუბრა. მერმა On.ge-ს ჟურნალისტის კითხვას დასაწყისში იუმორით და ღიმილით უპასუხა და თქვა, "მერიის ოპერატორსაც აბრალებდნენ..." მითითების შემდეგ, რომ ეს არ იყო საკითხი, რომელზეც ხუმრობა შეიძლებოდა, კახა კალაძემ თქვა, რომ ნებისმიერ ადამიანს შეუძლია, ნებისმიერ ადამიანზე იგივე ბრალდება წამოაყენოს.

"ამ ადამიანს ვიცნობ რამდენიმე წელია, ვიცი როგორი ცხოვრებით ცხოვრობს. ეს ძალიან მძიმე ბრალდებაა, დაველოდოთ გამოძიება. ამას სჭირდება მტკიცებულებები", — ამბობს კალაძე.

თბილისის საკრებულოში ქართული ოცნების დეპუტატს, ილია ჯიშკარიანს თანამშრომელი, თამთა თოდაძე სექსუალურ და ფიზიკურ ძალადობაში ადანაშაულებს. ძალადობის სავარაუდო მსხვერპლი მთავარ არხთან ყვება, რომ ჯიშკარიანმა მასზე სექსუალური ძალადობა სცადა, როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ გამოძიება სამი მუხლით დაიწყო.

თამთა თოდაძის დედის თქმით, ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.