ტელეკომპანია პირველის ინფორმაციით, ქართული ოცნების წევრი, ვანო ზარდიაშვილი უახლოეს დღეებში პარლამენტის სადეპუტატო მანდატს დატოვებს. ზარდიაშვილმა ტელეკომპანიასთან ინფორმაცია უარყო.

"ამ ეტაპზე არაფერი მაგდაგვარი გადაწყვეტილება არ მიმიღია, დაველოდოთ დროს და ნუ გავუსწრებთ მოვლენებს", — განაცხადა დეპუტატმა.

ვანო ზარდიაშვილი 2016 წლიდან პარლამენტის დეპუტატია. არასამთავრობო ორგანიზაციები და ოპოზიცია მას ე.წ. სასამართლო კლანის ნაწილად მოიხსენიებს.

ბოლო დროს მას მწვავე დაპირისპირება ჰქონდა დეპუტატ ეკა ბესელიასთან. 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო. ბესელია ამბობს, რომ საბოდიშო არაფერი აქვს.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.