ტელეკომპანია ფორმულას დირექტორმა თითქმის ცხრასაათიანი გამოკითხვის შემდეგ პროკურატურის შენობა დატოვა. როგორც ზუკა გუმბარიძემ ჟურნალისტებს უთხრა, კითხვები ინტერმედიას საქმეს უკავშირდებოდა. ის პროკურატურაში დაბარებას ფორმულას მაუწყებლობის დაწყებას უკავშირებს.

"თავად კითხვების აბსურდულობა, ხშირ შემთხვევაში, არის მიზეზი ამ ეჭვების გაჩენის", — აღნიშნა გუმბარიძემ და დაამატა, რომ გაუთქმელობაზე აქვს ხელი მოწერილი, რის გამოც დეტალებზე ვერ ისაუბრებს.

ზუკა გუმბარიძე დღეს, 2 ოქტომბერს პროკურატურაში მოწმის სტატუსით იკითხებოდა. მისივე თქმით, სტატუსის შეცვლაზე საუბარი არ ყოფილა.

ის პროკურატურაში გუშინ, პირველ ოქტომბერს დაიბარეს. სწორედ ამ დღეს დაიწყო ფორმულამ მაუწყებლობა.

ზუკა გუმბარიძე კომპანია ინტერმედიას დამფუძნებელიცაა, რომლის საქმესაც პროკურატურა იძიებს. ინტერმედია რუსთავი 2-ის კონტრაქტორი სარეკლამო კომპანიაა. უწყება სწავლობს ინტერ მედია პლიუსის მიერ მიღებული დიდი ოდენობით თანხების ხარჯვის კანონიერებას.

საგამოძიებო უწყების ინფორმაციით, 2015 წლის საანგარიშო პერიოდში რუსთავი 2-ის მიერ მიღებულმა დეკლარირებულმა ზარალმა 7 377 230 ლარი შეადგინა, ამავე პერიოდში ინტერ მედია პლიუსის დეკლარირებულმა მოგებამ კი 8 690 664 ლარი.

ამ კომპანიის კონტექსტში, 9 აგვისტოს გამართულ ბრიფინგზე პროკურორმა ახსენა ზუკა გუმბარიძე, რომელმაც თანამოაზრეებთან ერთად რუსთავი 2-ის ხალვაშისთვის გადაცემის შემდეგ ახალი არხის გახსნა დააანონსა.