დღეს ერთ ამერიკელ ქალზე მოგიყვებით, რომელსაც, სამწუხაროდ არ აქვს სახლი და ცხოვრების უმეტეს ნაწილს ქუჩაში ატარებს. თუმცა, აქვს ის, რამაც რამდენიმე წამში ვარსკვლავად აქცია.

საქმე ის არის, რომ 52 წლის ემილი ზამორკამ ლოს-ანჯელესის მეტროში ოპერა იმღერა, ამ ყველაფრის ამსახველი ემოციური ვიდეო მთელ მსოფლიოში გავრცელდა და ადამიანების დიდი სიყვარულიც დაიმსახურა.

ქალი 28 წლის წინ რუსეთში ცხოვრობდა და მევიოლინე იყო, დღეს კი უსახლკარო ემიგრანტია, რომელსაც საკუთარი თავის გამოსაკვებად მეტროში დგომა და გამვლელებისთვის სიმღერა უწევს.

ვიდეო, რომელშიც ემილი "O Mio Babbino Caro"-ს ასრულებს, ადგილობრივმა პოლიციის ოფიცერმა გადაიღო და ტვიტერზე ატვირთა წარწერით — "ლოს-ანჯელესი 4 მილიონი ადამიანის სახლია, აქ ამდენივე ისტორიაა და ამდენივე ხმა... ზოგჯერ უბრალოდ გვმართებს, გავჩერდეთ და მოვუსმინოთ თუ რა ლამაზად ჟღერენ ისინი".

ის 24 წლის იყო, როდესაც ამერიკაში ჩავიდა, უსახლკარო კი მას შემდეგ გახდა, რაც სამსახური დაკარგა და სახლის ქირა ვეღარ გადაიხადა.

"ახლა ყუთში მძინავს, კი, იქ ვიძინებ სადაც ამის საშუალება მაქვს. ადამიანების ყურადღება მსიამოვნებს, თუმცა, არ მინდა, რომ ვინმესთვის ტვირთი ვიყო. ბედნიერი ვიქნები თუ ქუჩას თავს დავაღწევ და საცხოვრებელთან ერთად, საკუთარი ინსტრუმენტიც მექნება", — ამბობს უსახლკარო მომღერალი.