ჩინეთის სახალხო რესპუბლიკის 70 წლისთავზე ჰონგ-კონგში საპროტესტო აქცია მიმდინარეობს. აქციის დაშლისას პოლიციამ ცეცხლსასროლი იარაღი გამოიყენა და ერთი დემონსტრანტი დაჭრა. პოლიციას იარაღი აქამდეც გამოუყენებია, მაგრამ მაშინ ამას მხოლოდ გაფრთხილებით ხსნიდნენ.

როგორც ცნობილია, დაჭრილი კრიტიკულ მდგომარეობაშია. სოციალურ ქსელში სროლის არაერთი ვიდეო გავრცელდა. ერთ-ერთში ჩანს, დემონსტრანტს მკერდში ესვრიან.

ჰონგ-კონგში ახალგაზრდები ქუჩაში მაშინ გამვიდნენ, როდესაც დანარჩენ ჩინეთში რესპუბლიკის შექმნას აღნიშნავდნენ. აქციის მონაწილეები პირველ ოქტომბერს გლოვის დღეს უწოდებენ.

დემონსტრაციას შეტაკების გარეშე არ ჩაუვლია. პოლიციამ ისევ გამოიყენა წყლის ჭავლი და ცრემლსადენი გაზი. დაპირისპირების შედეგად საავადმყოფოში 30 ადამიანი გადაიყვანეს, მათგან ორი კრიტიკულ მდგომარეობაშია.

მერვე თვეა ჰონგ-კონგში საპროტესტო მუხტი არ ნელდება. მოსახლეობის მასობრივი უკმაყოფილება საექსტრადიციო კანონმა გამოიწვია. წარმოდგენილი პროექტი ითვალისწინებს აღმასრულებელი ხელისუფლების გადაწყვეტილებით ბრალდებულების გადაცემას ნებისმიერი იურისდიქციისთვის, რომელთანაც არ აქვს ექსტრადიციის შესახებ შეთანხმება, მათ შორის ჩინეთისთვის.

ჰონგ-კონგს დიდი ბრიტანეთის კოლონიის სტატუსი 1997 წელს ჩამოერთვა და ჩინეთის შემადგენლობაში იმ პირობით შევიდა, რომ ფართო ავტონომია ექნებოდა, გარდა თავდაცვითი და საგარეო საკითხებისა, ის დამოუკიდებლად მიიღებდა გადაწყვეტილებებს.

მაშინდელი ლიდერები საზოგადოებას დაჰპირდნენ, რომ ჰონგ-კონგი, მაკაო და შეერთების შემთხვევაში ტაივანი, შეინარჩუნებდა პრინციპს — ერთი ქვეყანა, ორი სისტემა.

ამავე თემაზე: