ექსპრეზიდენტმა მიხეილ სააკაშვილმა კიდევ ერთხელ განაცხადა, რომ საქართველოში დაბრუნებას აპირებს. ამის შესახებ მან მთავარი არხის ეთერში, გადაცემა მთავარ აქცენტებში ისაუბრა. წამყვანების კითხვაზე, ჩამოვა თუ არა რეალურად, რადგან ეს პირველი დაპირება არ არის, ის პასუხობს: "მე პირობას ყოველთვის ვასრულებ".

სააკაშვილმა განაცხადა, რომ უკრაინაში ჩასვლის დროსაც იცოდა, რომ დაიჭერდნენ, მაგრამ მაინც გადადგა ეს ნაბიჯი. კითხვაზე, აქვს თუ არა მოლოდინი, რომ მასაც დაიჭერენ, ის პასუხობს: "ამას გადაწყვეტს ქართველი ხალხი".

სააკაშვილმა ჩამოსვლის მთავარ მიზეზად ქვეყნის გადარჩენა დაასახელა. როგორც არაერთგზის აქამდე, მან აღნიშნა, რომ საქართველო ბიძინა ივანიშვილისგან უნდა გაათავისუფლოს. გარდა ამისა, თქვა, რომ ენატრება საქართველო და თავისი ვენახი.

სააკაშვილმა განაცხადა ისიც, რომ ჯერ არ ფიქრობს 2020 წლის არჩევნებში ნაციონალური მოძრაობის გამარჯვების შემთხვევაში პრემიერობაზე. "ჯერ გავფრინდეთ", — ასე უპასუხა მან ამ საკითხზე დასმულ შეკითხვას და აღნიშნა, რომ პოლიტიკაში ახალგაზრდების დროა, რომლებისთვისაც "ხიდი იქნება".

დაბრუნების პირობა სააკაშვილმა ჯერ კიდევ 2018 წელს დადო. თბილისში, რუსთაველის გამზირზე გამართულ ნაციონალური მოძრაობის აქციაზე მიხეილ სააკაშვილმა იქ დამსწრე მხარდამჭერებს უთხრა, რომ როგორც კი დაუძახებენ, "იმ წამს გაჩნდება მათ გვერდით". ამის შესახებ ის საუბრობდა სხვადასხვა სატელევიზიო ეთერებსა და მისივე გავრცელებულ ვიდეომიმართვებშიც.

სააკაშვილის წინააღმდეგ საქართველოში ოთხი მუხლით არის აღძრული სისხლის სამართლის საქმე.