"ჩემი მანდატის დატოვებაზე მავანნი ოცნებობს, მაგრამ ამას ვერ ეღირსებიან", — ასე უპასუხა დამოუკიდებელმა დეპუტატმა, ეკა ბესელიამ ქართული ოცნების დეპუტატების, დავით მათიკაშვილისა და რატი იონათამიშვილის მოწოდებას მისი გადადგომის შესახებ. ბესელიას თქმით, მას არ აქვს დასამტკიცებელი, რომ მანდატი და თანამდებობა მისთვის რამეს ნიშნავს, მაგრამ პარლამენტის დატოვება არ აპირებს.

ბესელია განმარტავს, რომ ეს დაამტკიცა, როცა იურიდიული კომიტეტის თავმჯდომარეობა დატოვა მოსამართლეთა სიის გამო. ასევე ამბობს, რომ დეპუტატის მანდატი ერთხელ უკვე დატოვა 2009 წელს, რადგან მიაჩნდა, რომ ექსპრეზიდენტმა, მიხეილ სააკაშვილმა არჩევნები გააყალბა.

დღეს, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო.

ბესელია ამბობს, რომ საბოდიშო არაფერი აქვს. ის აფრთხილებს ყველას, რომ მსგავსი ქცევის შემთხვევაში, იგივე პასუხს მიიღებენ.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.

ამავე თემაზე: