1993 წელს სტივენ სპილბერგმა გადაიღო სათავგადასავლო ფილმი Jurassic Park, რომელმაც საოცრად დაძაბული სიუჟეტითა და იმ დროისთვის უჩვეულოდ რეალისტური სპეცეფექტებით, მაყურებლებზე წარუშლელი კვალი დატოვა. ფილმი იმდენად მომგებიანი გამოდგა, რომ კიდევ ორი ახალი ნაწილიც გადაიღეს 1997 და 2001 წლებში.

2015 წელს კი სპილბერგის მიერ შექმნილი საშიში და ბევრისთვის ეგზოტიკური სამყარო ხელახლა გააცოცხლეს, ოღონდ ამჯერად უფრო დიდი მასშტაბებით - Jurassic World თანამედროვეობის ერთ-ერთი ყველაზე პოპულარული ბლოკბასტერია. მსახიობ კრის პრატის მიერ შესრულებული მთავარი გმირის თავგადასავალი ამჯერადაც არ დამთავრებულა მალევე და 2018 წელს გამოსული მეორე ნაწილის შემდეგ უკვე იღებენ Jurassic World 3-ს, რომელსაც, არც მეტი არც ნაკლები, 1993 წლის Jurassic Park-ის სამი მთავარი მსახიობი შემოურთდება!

რეჟისორ კოლინ ტრივოროუს განცხადებით, ახალ ფილმში მნიშვნელოვან როლებს შეასრულებენ ლორა დერნი, ჯეფ გოლდბლუმი და სემ ნაილი - ისინი, ვინც დიდი წვლილი ითამაშეს კინოსამყაროში Jurassic Park-ის წარმატების მიღწევაში.

მართალია, ლორა დერნი ბოლო წლებში სერიალ Big Little Lies-ში რენატა კლაინის როლის ყველასათვის დასამახსოვრებლად შესრულების შემდეგ რთულად წარმოსადგენია უცნაური ურჩხულების დევნაში, მაგრამ, შეგვიძლია ისიც ვიფიქროთ, რომ ამჯერად დინოზავრის ყიდვა გადაწყვიტა თავისი შვილისთვის.