რუსეთის საგარეო საქმეთა მინისტრმა, სერგეი ლავროვმა საქართველოსთან ავიამიმოსვლის აღდგენის სურვილი გამოთქვა. მისი თქმით, ამის მიზეზი ისაა, რომ "საქართველოში უმრავლესობამ მართლმადიდებლობის საპარლამენტო ასამბლეაზე რუსეთის წინააღმდეგ პროვოკაციის კონტრპროდუქტიულობა გააცნობიერა".

"ალბათ, ფრენებს დავაბრუნებდი. მგონია, რომ ეს სწორი იქნება მას შემდეგ, რაც საქართველოს მოსახლეობის უმრავლესობამ გააცნობიერა იმ პროვოკაციული გამოხტომის კონტრპროდუქტიულობა, რომელიც საქართველოს პარლამენტში მოხდა", — ამბობს ლავროვი.

20 ივნისის მოვლენებისა შემდეგ რუსეთის პრეზიდენტის განკარგულებით, რუსი მოქალაქეების უსაფრთხოების მოტივით 8 ივლისიდან საქართველოსთან სამგზავრო ავიამიმოსვლა შეწყდა. ამ დღეს საქართველოში მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. გავრილოვის მიერ სკამის დაკავებას საპროტესტო ტალღა მოჰყვა. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.