ბრაზილიის პრეზიდენტი, ჟაირ ბოლსონარუ აცხადებს, რომ ამაზონის ტყეები ბრაზილიის სუვერენული ტერიტორიაა. მისივე თქმით, მცდარია შეხედულებაა, რომ ამაზონი კაცობრიობის მემკვიდრეობა და დედამიწის ფილტვებია. ამის შესახეb მან გაეროში სიტყვით გამოსვლის დროს განაცხადა.

2019 წელს ივლისში ამაზონის ტროპიკულ ტყეებში ხანძრების რეკორდული მაჩვენებელი დაფიქსირდა. კოსმოსური კვლევების ეროვნული ინსტიტუტის (Inpe) ინფორმაციით, წინა წლის ანალოგიურ პერიოდთან შედარებით ხანძრების რაოდენობა 84 პროცენტით გაიზარდა.

უფლებადამცველები ამაზონის ტყეების ხანძრებში ბრაზილიის ულტრამემარჯვენე პრეზიდენტ ჟაირ ბოლსონარუს ადანაშაულებენ, რადგან მისი ეკოლოგიური პოლიტიკის გამო ტყეების დანაკარგები გაიზარდა. ბოლსონარუ ამბობდა, რომ ამაზონის ტროპიკული ტყეების მასშტაბური ხანძრის ჩასაქრობად ხელისუფლებას რესურსი არ აქვს. ხანძრის გაჩენაში კი არასამთავრობო ორგანიზაციები დაადანაშაულა, რომლებიც "დაფინანსების შემცირების გამო სამაგიეროს უხდიან".

საერთაშორისო ზეწოლის შემდეგ ჟაირ ბოლსონარუმ ხანძრებთან საბრძოლველად 44 ათასი სამხედრო გამოყო, რომლებიც შვიდ სხვადასხვა რეგიონში განლაგდნენ.