რუსთავი 2-ში დაბრუნებამდე მთავარი საინფორმაციო გამოშვების წამყვანი, ნათია ლაზაშვილი მთავარ პროკურატურასა და მთავრობის ადმინისტრაციაში კონსულტანტის თანამდებობაზე მუშაობდა. მისი სამსახურების შესახებ ინფორმაცია მისი ქმრის დეკლარაციაშია მითითებული.

ნათია ლაზაშვილი მთავარ პროკურატურაში სტრატეგიული კომუნიკაციების საკითხებში მრჩევლად 2018 წლის 13 აგვისტოდან 31 დეკემბრამდე მუშაობდა და 22 500 ლარი გამოიმუშავა. გასულ წელსვე კომუნიკაციების დეპარტამენტში მუშაობის დროს, 7 თვეში ანაზღაურებად 35 ათასი ლარი მიიღო.

ლაზაშვილი მთავრობის ადმინისტრაციაში მუშაობდა 2017 წელსაც. მისი ანაზღაურება 6 თვეში 77 500 ლარი იყო.

დღეს, 25 სექტემბერს ერთ თვეზე მეტი გავიდა მას შემდეგ, რაც კურიერი ეთერში არ გასულა. 21 აგვისტოს არხი პროტესტის ნიშნად დატოვა ჟურნალისტების უმრავლესობამ. ამას წინ უსწრებდა ქიბარ ხალვაშის მიერ რუსთავი 2-დან საინფორმაციო სამსახურის უფროსის, ნოდარ მელაძის გათავისუფლება. მისივე გადაწყვეტილებით არხმა ხელშეკრულება შეუწყვიტა საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს.