NDI-ის კვლევაში გამოკითხულთა 78 პროცენტი ამბობს, რომ მათთვის მისაღებია გაცხადებული მიზანი, საქართველო გახდეს ევროკავშირის წევრი. იანვარში გამოქვეყნებული NDI-ის კვლევით, ევროკავშირისა და ნატოს მიმართ მხარდაჭერა 2013 წლის შემდეგ ყველაზე მაღალი იყო. მაშინ მოსახლეობის 83 პროცენტი უჭერდა მხარს ბლოკში გაწევრიანებას.

ასაკის მიხედვით, ევროკავშირში გაწევრიანების მომხრეები ძირითადად 18-დან 34 წლამდე ასაკის ადამიანები არიან. დასახლების მიხედვით, დიდ ქალაქებში 82 პროცენტი ეთანხმება ევროინტეგრაციას, ხოლო სქესის მიხედვით, ქალების 80, ხოლო კაცების 75 პროცენტი ევროკავშირში გაწევრიანების მომხრეა.

NDI-მ გამოიკვლია ჩრდილოატლანტიკური ალიანსის მიმართ განწყობებიც. კვლევით დადგინდა, რომ მოსახლეობის 71 პროცენტი უჭერს მხარს ნატოში გაწვრიანებას, ხოლო 17 %-სთვის ეს მიუღებელია. ნატოს ყველაზე ნაკლები მხარდაჭერა საქართველოს უმცირესობათა დასახლებებში აქვს. ასაკის მიხედვით კი ნატოში გაწევრიანების მომხრეები ძირითადად 18-დან 54 წლამდე ასაკის ადამიანები არიან.

კვლევა 2019 წლის 13-29 ივლისის პერიოდში ჩატარდა. გამოიკითხა საქართველოს მასშტაბით 2 131 ადამიანი პირისპირ ინტერვიუს წარმომადგენლობითი შერჩევის საფუძველზე. გამოკითხვის საშუალო ცდომილების ზღვარი არის +/- 1,7%.