"ბევრ საოცარ რამეს ამბობს ხოლმე, განსაკუთრებით ამ ბოლო დროს ბატონი ხაზარაძე", — ასე გამოეხმაურა საქართველოს პრემიერ-მინისტრი, გიორგი გახარია მამუკა ხაზარაძის განცხადებას, რომლის მიხედვითაც, მთავრობა ანაკლიის პორტის მსხვილ ინვესტორებს უარს ეუბნება.

გახარიას თქმით, ანაკლიის პროექტის განხორციელებას პასუხისმგებლიანი და სერიოზული ინვესტორები სჭირდება, რომელიც არ ჰყავთ.

"საერთოდ, მინდა ხაზგასმით აღვნიშნო, არ არის კარგი, როცა ქვეყნისთვის მნიშვნელოვანი სტრატეგიული პროექტი ხდება პოლიტიკური სპეკულაციისა და ჭორაობის საგანი. ანაკლია არ ეკუთვნის არც ერთ ფიზიკურ პირს. ანაკლია, როგორც პროექტი, ეკუთვნის ქვეყნის განვითარებას, შესაბამისად, ყველა ცოტა უფრო პასუხისმგებლიანად უნდა მოექცეს ქვეყნისთვის მნიშვნელოვან პროექტებს", — განაცხადა გიორგი გახარიამ.

მისი თქმით, სახელმწიფო ყველა ვალდებულებას ასრულებს და "ვიღაცის ინტერესებზე " საუბარი "არასერიოზულია".

"ანაკლიის პროექტთან დაკავშირებით ყოველთვის ვამბობდი, ის რომ წარმატებით განხორციელდეს, სჭირდება პასუხისმგებლიანი და სერიოზული ინვესტორები. სახელმწიფო ყველა თავის ვალდებულებას ასრულებდა და შეასრულებს, ანაკლიას ღრმაწყლოვან პორტს სჭირდება პასუხისმგებლიანი და სერიოზული ინვესტორები, რომელიც არ გვყავს, სახელმწიფო უჭერდა მხარს ამ პროექტს და დაუჭერს მხარს. არც ერთი სერიოზული უცხოელი და ჩვენთვის ძალზედ მნიშვნელოვანი პარტნიორი არ დარჩა კონსორციუმში და კიდევ რაღაც ინტერესებს აბრალებენ. ეს არის არასერიოზული", — თქვა გახარიამ.

ბიზნესმენ მამუკა ხაზარაძის თქმით, ვიცე-პრემიერმა და ინფრასტრუქტურის მინისტრმა, მაია ცქიტიშვილმა ანაკლიის პორტის ინვესტორს, ინგლისურ კომპანია მერიდიანს უთხრა, რომ მისნაირი ინვესტორი არ სჭირდება. როგორც ხაზარაძემ გადაცემა მთავარ აქცენტებში განაცხადა, მსხვილმა საინვესტიციო ფონდმა მინისტრთან შეხვედრა რამდენიმე დღის წინ გამართა.

გარდა ამისა, ხაზარაძე ამბობს, რომ კიდევ ერთ ინვესტორს, ამერიკული კომპანიას ხელისუფლების წარმომადგენელი დაუკავშირდა და ინვესტიციები შეაჩერებინა. მისივე თქმით, ინვესტორებმა ხელისუფლების წარმომადგენლის ვინაობა არ გაუმხილეს:

ანაკლიის ღრმაწყლოვანი პორტის პროექტზე მუშაობა ანაკლიის განვითარების კონსორციუმმა და სახელმწიფომ 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა წელიწადში 100 მლნ ტონა იქნება. პორტი ოკუპირებული ტერიტორიებიდან რამდენიმე ათეული კილომეტრითაა დაშორებული.

თიბისის საქმე და ანაკლიის პორტი

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს.

ამ საქმესთან დაკავშირებით 13 თებერვალს საქართველოს ეროვნულმა ბანკმა თიბისი ბანკში მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

ეროვნული ბანკის მოთხოვნის შემდეგ კომპანიის საბაზრო კაპიტალიზაცია 7,29 პროცენტით შემცირდა, რეალურ თანხაში ეს მაჩვენებელი 55 მილიონზე მეტი გირვანქა სტერლინგია.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

მოგვიანებით, მაშინდელმა ეკონომიკის მინისტრმა, გიორგი ქობულიამ თქვა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

შემდგომში უკვე მამუკა ხაზარაძემ და ბადრი ჯაფარიძემ ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტები დატოვეს.

2019 წლის აგვისტოში ანაკლიის განვითარების კონსორციუმი ერთ-ერთმა მთავარმა ინვესტორმა, ამერიკულმა კონტი ჯგუფმა დატოვა. კონსორციუმის აღმასრულებელი დირექტორი, ლევან ახვლედიანი აცხადებდა, რომ კონტი ჯგუფის გასვლა პროექტს მნიშვნელოვნად არ დააზიანებს. მისივე თქმით, ბოლო პერიოდში კონტი ჯგუფს ისედაც ძალიან პასიური როლი ჰქონდა.