"ერთ დროს ერთიანი ნაციონალური მოძრაობის სხვადასხვა განშტოების მხრიდან დღემდე არ წყდება ქვეყნისა და ხალხისთვის ზიანის მომტანი უკიდურესად სარისკო აქტივობების ინიცირება", — ამის შესახებ საპარლამენტო უმრავლესობის ლიდერმა გია ვოლსკიმ ევროპული საქართველოს დადგენილების პროექტთან დაკავშირებით გამართულ ბრიფინგზე განაცხადა.

ევროპული საქართველო რუსეთისთვის საერთაშორისო დონეზე სანქციების გაზრდას ითხოვს და საქართველოს ტერიტორიების ოკუპაციის საკითხის აქტუალიზაციის მიზნით დადგენილების პროექტი დაარეგისტრირა.

გია ვოლსკის თქმით, ევროპული საქართველოს ინიციატივა "მავნეა და საქართველოსა და ქართველი ხალხის, განსაკუთრებით, ქვეყნის გარეთ მცხოვრები ასობით ათასი მოქალაქის დასჯას ისახავს მიზნად.

"საქართველოს გამთლიანება, რუსული ოკუპაციის დაძლევა და ქართველი ხალხის ევროატლანტიკური არჩევანის რეალიზაცია მხოლოდ ქვეყნის მშვიდობიანი და დემოკრატიული განვითარებითაა შესაძლებელი. გაცხადებული საგარეო პოლიტიკა, მისი რეალიზაციის შედეგები თვალსაჩინო და ხელშესახებია.,იგულისხმება ურთიერთობები ნატოსთან, აშშ-სთან ევროკავშირთან და ყველა ჩვენს პარტნიორი ქვეყანასთან. თვალსაჩინოდ მეტია მიღებული რეზოლუციები და მხარდამჭერი აქტები საქართველოს ინტერესების გათვალისწინებთ. ამ არჩევანის ერთგული საქართველოს ხელისუფლება იყო და მომავალშიც დარჩება პრინციპული, პასუხისმგებლიანი და თანმიმდევრული პოლიტიკის მომხრე. 7 წელია ქართული ოცნება წინა ხელისუფლების მავნე პოლიტიკით გამოწვეული კატასტროფული შედეგების ლიკვიდაციითაა დაკავებული. ერთ დროს ერთიანი ნაციონალური მოძრაობის სხვადასხვა განშტოების მხრიდან დღემდე არ წყდება ქვეყნისა და ხალხისთვის ზიანის მომტანი უკიდურესად სარისკო აქტივობების ინიცირება", — განაცხადა გია ვოლსკიმ ბრიფინგზე.

მისი აზრით, ევროპული საქართველოს მიზანია, გადაფარონ დანაშაულებრივი შეცდომები, ხოლო ოკუპაციის ფასი გადაიხადოს არა რუსეთმა, არამედ ქართველმა ხალხმა, საქართველომ.

"ხელისუფლებაში ყოფნის დროს მათ არაერთხელ მოახერხეს და დაატეხეს ქვეყანას ჯერ ეკონომიკური სანქციები შემდეგ კი რუსეთის ჯარს შემოუძღვნენ საქართველოში. სხვა ახსნა არ შეიძლება ჰქონდეს ინიციატივას, რომელიც ფორმით თითქოს რუსეთისთვის პრობლემების შექმნას გულისხმობს, რეალურად, რუსეთის მხრიდან საქართველოსადმი მძიმე ეკონომიკური სანქციებს გარანტირებულად დაწესებისათვის არის გამიზნული, შეუძლებელია ეს არ ესმოდეთ ინიციატივის ავტორებს, რადგან ესმით, სწორედაც ამ შედეგების გამოწვევა სურთ", — განაცხადა ვოლსკიმ.

დეპუტატის განცხადებით, საქართველოს აღმასრულებელ ხელისუფლებას არ სჭირდება კარნახი, როგორ და რა გზით უზრუნველყოს ეროვნული ინტერესების დაცვა: "სწორედ, ჩვენი ხელისუფლების პირობებში იქნა მიღწეული არა მყვირალა და პიარ-ეფექტზე გათვლილი, არამედ ხელშესახები პროგრესი ამ რთულ და წინააღმდეგობებით აღსავსე გზაზე, ევროპული და ევროატლანტიკური ინტეგრაციის გზაზე. ჩვენ ამ კურსიდან გადახვევას არ ვაპირებთ, შესაბამისად, ევროპული საქართველოს მავნე ინიციატივას საქართველოსა და ქართველი ხალხის განსაკუთრებით ქვეყნის გარეთ მცხოვრები ასობით ათასი ჩვენი თანამოქალაქის დასჯის შესახებ საქართველოს პარლამენტი მხარს არ დაუჭერს".

ევროპულმა საქართველომ შეიმუშავა დადგენილების პროექტი, რომლის მიზანიც საქართველოს ტერიტორიების ოკუპაციის საკითხის საერთაშორისო დღის წესრიგში აქტუალიზაციაა. პროექტს დღეს, 16 სექტემბერს ევროპასთან ინტეგრაციის კომიტეტის სხდომაზე განიხილავენ.