თიბისი ბანკის დამფუძნებლის, მამუკა ხაზარაძის ადვოკატი, ეკა ეგუტია ამბობს, რომ ბიზნესმენის მიმართ გაგზავნილ მუქარის წერილზე ლონდონის ექსპერტიზამ მრავალი ადამიანის თითის ანაბეჭდი აღმოაჩინა. როგორც მან მთავარ არხს განუცხადა, ანაბეჭდების მფლობელების დასადგენად საჭიროა ქართული სამართალდამცავების ჩართულობა, რათა ის საქართველოს მოქალაქეთა ბაზასთან შედარდეს.

"კვლავ გრძელდება ამის ანალიზი ლინგვისტური თვალსაზრისით და კიდევ სხვა ეტაპებსაც გაივლის. აქ არის საკითხი შედარება უკვე იმ პირების მონაცემთა ბაზაში, რომელიც საქართველოშია", — აღნიშნა ადვოკატმა.

შს მინისტრისგან მუქარის სავარაუდო წერილზე მამუკა ხაზარაძემ პარლამენტში 4 მარტს ისაუბრა. ბიზნესმენის თქმით, წერილში ეწერა, რომ მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე. როგორც ხაზარაძე აცხადებს, წერილი მას შუამავალმა გადასცა.

ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. მისი თქმით, გამოძების ნაცვლად, პასუხად მიიღო ბრიფინგი და ბრალდება ფულის გათეთრების საქმეზე. თუმცა, პროკურატურაში ხაზარაძის ბრალდება უარყვეს და განაცხადეს, რომ დაკითხვისას ბიზნესმენმა მუქარა მხოლოდ ეროვნულ ბანკთან მიმართებაში გამოიყენა. უწყებაში განმარტავენ, რომ საუბარია ეროვნული ბანკის ოფიციალურ წერილზე, რომელშიც მამუკა ხაზარაძისა და ბადრი ჯაფარიძის გადადგომის მოთხოვნაზე იყო საუბარი.

მაშინდელმა შინაგან საქმეთა მინისტრმა, გიორგი გახარიამ ბრალდებები უარყო და განაცხადა, რომ ეს არის "პრივილეგირებული ბიზნესმენის მცდელობა, პარლამენტიდან ჭორაობით იმუნიტეტი მოიპოვოს". მისივე თქმით, საკუთარ სიტყვებზე პასუხის გაცემა ყველას მოუწევდა.

წერილის მიხედვით, ხაზარაძეს სამ პირობის შესრულებას სთხოვდნენ. პირველი — ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ. მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში. მესამე — ტელეკომპანია არტარეა, რომელიც ხაზარაძის საკუთრებაა, ჩაერთოს პოლიტიკურ კამპანიაში.