სერიალ ჩემი ცოლის დაქალების მსახიობი, ქეთი ხუციშვილი რუსთავი 2-ის კომედი ჯგუფს შეუერთდა. ამის შესახებ ინფორმაცია პრაიმტაიმმა გაავრცელა, მსახიობმა კი On.ge-ს დაუდასტურა.

მისი თქმით, ის კვლავ ითამაშებს ჩემი ცოლის დაქალებში, რომელიც რუსთავი 2-ის ნაცვლად ფორმულა კრეატივის ახალ არხზე გავა. მსახიობი ამბობს, რომ არცერთი არხის მენეჯმენტს პრობლემა არ ჰქონია იმასთან დაკავშირებით, რომ ის ორივე ტელევიზიაში იმუშავებს.

ქეთი ხუციშვილი სერიალ ჩემი ცოლის დაქალებში ლუნას როლს თამაშობს. პირველ აგვისტოს On.ge-ს ფორმულა კრეატივში უთხრეს, რომ ჩემი ცოლის დაქალები რუსთავი 2-ზე აღარ გავა.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე, საზოგადოებრივი და პოლიტიკური ტოქ-შოუს მთავარი პროდიუსერი, გიორგი ლაფერაშვილი; პოლიტიკური გადაცემების წამყვანები, გიორგი გაბუნია და ეკა კვესიტაძე და გასართობი გადაცემის ავტორი და წამყვანი, ნანუკა ჟორჟოლიანი.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა. 21 აგვისტოს ტელეკომპანია თითქმის სრული შემადგენლობით დატოვეს ჟურნალისტებმა. რუსთავი 2 დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვეს P.S.-ის გუნდმა და რეგიონის ჟურნალისტებმა. გარდა ამისა, რუსთავი 2 დატოვა ვანო ჯავახიშვილმა, თამუნა ლეკვეიშვილმა, თათია სულუაშვილმა, ვასო ფხაკაძემ და კომედი ჯგუფის რამდენიმე მსახიობმა.