მადრიდული სთრით არტი ისეთი ცნობილი არ არის, როგორც ლონდონის, ან პარიზის. თუმცა ის პოპულარობას ნელ-ნელა მაინც იკრებს. არიან არტისტები, რომლებიც მადრიდული სთრით არტის ახალ ტალღას ქმნიან. ქალაქში რამდენიმე სპეციფიკური ადგილია, სადაც შთამბეჭდავი ნამუშევრების ნახვაა შესაძლებელი.

ტაბაკალერა — ემბახადორეს დასახლება

ფოტო: Guillermo de la Madrid / Madrid Street Art Project

ტაბაკალერა დაახლოებით ისეთი ადგილია, როგორც თბილისში ფაბრიკა. აქ ადრე თამბაქოს ფაბრიკა იყო, თუმცა ახლა სივრცე სხვადასხვა სახელოსნოს ეთმობა, სადაც ატარებენ ვორქშოპებს ფოტოგრაფიაში, ცეკვაში, იოგაში და ა.შ.

გარშემო ტერიტორია მთლიანად დაფარულია სთრით არტით, რომელიც 25 სხვადასხვა არტისტს ეკუთვნის. ნამუშევრების ძირითადი თემატიკა ურბანული ბუნებაა. მხატვრები წელიწადში ერთხელ ტერიტორიის კედლებზე თავიდან ხატავენ, ისინი ამით სამოქალაქო ყურადღების გაზრდას ცდილობენ ისეთი საკითხების მიმართ, როგორიცაა გარემოს დაბინძურება, მწვანე სივრცეების ნაკლებობა და ქალაქის მაცხოვრებელთა პრობლემები. იეს ადამიანები საკუთარ მოძრაობას Muros Tabacalera-ს უწოდებენ.

სებადას ბაზარი

ფოტო: Marta Nimeva Nimevien/Flickr

სებადას ბაზარი ლა ლათინას დასახლებაში მდებარეობს და მის კედლებს ორივე მხრიდან, გარედანაც და შიგნიდანაც სთრით არტი ამშვენებს. ბაზარში ძირითადად ახალი ხილი და ბოსტნეული იყიდება, თუმცა ბევრი ადგილობრივი ბაზრის გარშემო არსებულ პლაზას დროის გასაყვანადაც სტუმრობს, ეს აქ ჩვეულებრივი ამბავია, განსაკუთრებით კი კვირა საღამოს.

მალასანა

მალასანა მადრიდის ერთ-ერთი საინტერესო უბანია. თუ გაგიმართლებთ, აქ, შესაძლოა, პარიზელი გრაფიტი არტისტის C215-ის ნამუშევრებსაც წააწყდეთ. უფრო თანამედროვე თუ დაგაინტერესებთ, მაშინ Nuria Mora და El Tono დაგაინტერესებთ. მათ ნამუშებრებს სალაო პლაზას მახლობლად შეხვდებით. მალასანას ტერიტორიაზე ხშირია Ze Carrion-ის ბენქსის სტილში შესრულებული ნამუშევრები, რომლებიც პოლიტიკური ხასიათითაა დატვირთული. ასევე ყურადღება მიაქციეთ გისოსებს, რომლებიც e1000-ის გრაფიტის საკმაოდ საინტერესო ნაწილია, მისი ნახატები ქუჩის შეუმჩნეველ დეტალებს სულ სხვა იერს აძლევს.

აიღეთ ტური

ფოტო: El Rey de la Ruina/Cool Tour Spain

20 ევროდ Cool Tour Spain მადრიდის არაჩვეულებრივ სთრით არტ ტურს შემოგთავაზებთ, რომელიც მადრიდის ქუჩის ხელოვნების სცენას საკმაოდ კარგად გაგაცნობთ. ეს იდეალური შემოთავაზებაა, თუ გუგლის რუკებში მისამართების ძებნა თქვენთვის დისკომფორტს წარმოადგენს. ტურები ოთხშაბათიდან კვირის ჩათვლით იმართება, 11-დან 5 საათამდე. თითო ტური ორიდან სამ საათამდე გრძელდება და ძალიან საინტერესო გამოცდილებას გპირდებათ.

გაინტერესებს, სად უნდა იპოვო ყველზე იაფი ავიაბილეთები? Aviabiletebi.org სწორედ ამისთვის შექმნილი პლატფორმაა. მისი აპლიკაცია, რომელიც ხელმისაწვდომია როგორც ანდროიდის, ისე iOS სისტემისთვის საშუალებას გაძლევთ, ბილეთების გარდა, ერთ სივრცეში მოძებნოთ სასტუმროებიც, ჰოსტელებიც და Airbnb-ის ბინებიც.