აშშ-ს პრეზიდენტი, დონალდ ტრამპი დიდი შვიდეულის სამიტზე კლიმატისა და ბიომრავალფეროვნების დისკუსიას, სადაც ამაზონის ჯუნგლების ხანძარი განიხილეს, არ დაესწრო.

The Guardian-ის ინფორმაციით, როდესაც ჟურნალისტებმა ტრამპს გამოტოვებული დისკუსიის შესახებ ჰკითხეს, მან უპასუხა: "ცოტა მოგვიანებით გვექნება". თუმცა მან ვერ გაიგო ჟურნალისტების ნათქვამი, რომ შეხვედრა უკვე გაიმართა.

საფრანგეთის პრეზიდენტმა, ემანუელ მაკრონმა დაადასტურა, რომ ტრამპი შეხვედრას არ დასწრებია, მაგრამ დისკუსიაში მისი გუნდი მონაწილეობდა. მისივე თქმით, ამაზონის ტყის ხანძრებთან დაკავშირებით მას მოლაპარაკებები ჰქონდა ტრამპთან და ის იზიარებდა მათ შეხედულებებს.

დონალდ ტრამპი კლიმატის ცვლილებებს სკეპტიკურად უდგება. მისი გადაწყვეტილებით, 2017 წელს აშშ-მ კლიმატის ცვლილების შესახებ პარიზის შეთანხმებაც დატოვა.

დიდი შვიდეულის სამიტი წელს საფრანგეთში, ქალაქ ბიარიცში მიმდინარეობს. პრეზიდენტმა მაკრონმა კლიმატური ცვლილებები დღის წესრიგის ერთ-ერთ მთავარ საკითხად შეიტანა. გარდა ამისა, სამიტზე ამაზონის ტყის ხანძრები განიხილეს და გადაწყდა, რომ G7-ის ქვეყნები (საფრანგეთი, აშშ, კანადა, იტალია, იაპონია, დიდი ბრიტანეთი, გერმანია) ბრაზილიას 22 მილიონი დოლარით დაეხმარებიან.