სამართლიანი არჩევნების აღმასრულებელი დირექტორი მიხეილ ბენიძე აცხადებს, რომ რუსთავი 2-დან ნოდარ მელაძის, ეკა კვესიტაძის, გიორგი გაბუნიას, გიორგი ლაფერაშვილისა და ნანუკა ჟორჟოლიანის გათავისუფლება ცნობილი სახეების "ჩამოშორება" იყო. მისივე თქმით, ეს არის მესიჯი სხვა ჟურნალისტებისთვისაც.

"ყველაზე ცნობადი სახეებიც კი არ არიან დაცული და ეს არის გზავნილი, ალბათ, ყველასთვის, რომ უნდა დამორჩილდეს ჟურნალისტი ახალ მფლობელსა და მენეჯმენტს და შესაბამისად, აისახოს ეს სარედაქციო პოლიტიკაზე", — აცხადებს ის რუსთავი 2-თან საუბრისას.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

გაიგეთ მეტი ჟურნალისტების გათავისუფლების მიზეზებზე: